რუსეთის პრეზიდენტმა, ვლადიმერ პუტინმა წარმოადგინა წინადადება, რომლის მიხედვითაც „როსგვარდიას“ ფედერაციის სუბიექტების უმაღლესი ოფიციალური პირების უსაფრთხოების უზრუნველყოფა დაევალება. შესაბამისი კანონპროექტი სახელმწიფო დუმის ელექტრონულ ბაზაშია გამოქვეყნებული.

როგორც კანონპროექტზე თანდართულ განმარტებით ჩანაწერშია აღნიშნული, უწყება რეგიონების უმაღლესი აღმასრულებელი ორგანოების ხელმძღვანელების დაცვას მხოლოდ კონტრაქტის საფუძველზე განახორციელებს, ხოლო სხვა პასუხისმგებელი პირების დაცვას, როგორც წესი, ხელშეკრულების საფუძველზე, იტყობინება ახალი ამბების სააგენტო „რია ნოვოსტი“.

თანხები, რომელსაც ეროვნული გვარდია აღნიშნული მომსახურებების გასაწევად მიიღებს, ბიუჯეტის კანონის შესაბამისად, ფედერალურ ბიუჯეტში იქნება სრულად აკუმულირებული.

კანონპროექტის განხილვის საკითხებში პრეზიდენტის ოფიციალურ წარმომადგენლად „როსგვარდიის“ დირექტორის მოადგილე, ეროვნული გვარდიის ჯარების მთავარსარდალი, სერგეი ლებედევი დაინიშნა.

ფედერალური კანონი მისი გამოქვეყნებიდან 180 დღის განმავლობაში უნდა შევიდეს ძალაში.

„როსგვარდია“ რუსეთის პრეზიდენტის 2016 წლის 5 აპრილის ბრძანების საფუძველზეა შექმნილი და მის შემადგენლობაში შინაგან საქმეთა სამინისტროს შინაგანი ჯარები, სწრაფი რეაგირების სპეციალური დანაყოფები და „ომონი“ შედის. რუსული ეროვნული გვარდია, ქვეყნის სამართალდამცავ ორგანოებთან ერთად ტერორიზმთან, ექსტრემიზმთან და ორგანიზებულ დანაშაულთან ბრძოლას აწარმოებს, ასევე იცავს მნიშვნელოვან სახელმწიფო ობიექტებს, სპეცტვირთებს; აკონტროლებს კერძო დაცვის საქმიანობას და იარაღის მოძრაობას.