69 წლის ასაკში ცნობილი რუსი მწერალი-სატირიკოსი, იუმორისტი და მსახიობი მიხეილ ზადორნოვი გარდაიცვალა. ინფორმაციას რუსული მედია ავრცელებს.

„რია ნოვოსტის“ ცნობით, ოქტომბრის დასაწყისში სოციალურ ქსელ „Вконтакте“-ს საკუთარ გვერდზე ზადორნოვმა განაცხადა, რომ ავადმყოფობის გამო ახალ წლამდე უნდა გადადოს კონცერტების ნაწილი, თუმცა დეტალები არ გაუმჟღავნებია. მასობრივი ინფორმაციის საშუალებების ცნობების მიხედვით, 2016 წლის დასაწყისში მას თავის ტვინის კიბოს დიაგნოზი დაუსვეს.

მისი მონოლოგების ყველაზე ცნობილი თემებია - დასავლური, პირველ რიგში ამერიკული ცხოვრების წესის და კულტურის კრიტიკა.

იგი 1948 წლის ივლისში იურმალაში დაიბადა. 1974 წელს დაამთავრა მოსკოვის საავიაციო ინსტიტუტი, „ინჟინერ-მექანიკოსის“ სპეციალობით. იმავე წელს დაიწყო ნაწერების გამოქვეყნება. ერთი პერიოდი ინსტიტუტში ინჟინრად მუშაობდა. იგი ასევე იყო სტუდენტური აგიტთეატრის МАИ „Россия“-ს სამხატვრო ხელმძღვანელი, შემდეგ კი ჟურნალ „იუნოსტის“ სატირისა და იუმორის განყოფილების უფროსი გახდა.

მისი სატელევიზიო დებიუტი 1982 წელს შედგა და ორი წლის შემდეგ იგი საკმაოდ პოპულარულ პერსონად იქცა.

მას დაწერილი აქვს ათ წიგნზე მეტი. მისი ნაწარმოებები მოიცავს სატირისტულ მოთხრობებს, ესეებს, პიესებს და სამოგზაურო ჩანაწერებს.