უზარმაზარი სამაშველო სამუშაოები მიმდინარეობს ირანის დასავლეთ რეგიონში მას შემდეგ, რაც ირან-ერაყის საზღვართან 7.3 მაგნიტუდის სიმძლავრის გამადგურებელმა მიწისძვრამ 400-ზე მეტი ადამიანის სიცოცხლე იმსხვერპლა და 7 000-ზე მეტს დაზიანებები მიაყენა.

სამაშველო ჯგუფები ცდილობენ იმ ადამიანების ნანგრევებიდან ამოყვანას, რომლებიც ჯერ კიდევ ცოცხლები არიან.

როგორც BBC წერს, კვირას ღამით მომხდარი მიწისძვრა ყველაზე საშინელია 2017 წელს მომხდარ მიწისძვრებს შორის.

ირანის სახელმწიფო მედიის ცნობით, დაღუპულთა უმეტესობა ირანის დასავლეთის, კერმანშაჰის პროვინციის მცხოვრები იყო.

BBC-ის ცნობით, მიწისძვრის შემდეგ, ერთ-ერთმა დახმარების სააგენტომ განაცხადა, რომ სასწრაფო თავშესაფარი ესაჭიროება 70 000 ადამიანს.

ერაყში კი მიწისძვრამ სულ მცირე 6 ადამიანის სიცოცხლე შეიწირა. ძლიერი ბიძგები იგრძნობოდა ქვეყნის დედაქალაქ ბაღდადში.

„ჩემს ბავშვებთან ვიჯექი და ვახშამს მივირთმევდით, როცა უეცრად შენობა ისე შეთამაშდა ცაში, რომ პირველად ვიფიქრე, უზარმაზარი ბომბი აფეთქდა-მეთქი, მაგრამ შემდეგ ჩემს გარშემო გავიგე ყვირილი: ‘მიწისძვრაა!“ განაცხადა ბაღდადში მცხოვრებმა ერთ-ერთმა ქალბატონმა.

დაღუპულთა უმრავლესობა ქალაქ სარპოლ-ე ზაჰაბის მკვიდრი იყო, რომელიც დაახლოებით 15 კილომეტრში მდებარეობს საზღვრიდან, განაცხადა ირანის საგანგებო სიტუაციების სამსახაურის ხელმძღვანელმა პირ ჰუსეინ კოლივანდმა ირანული ტელევიზიისთვის მიცემულ ინტერვიუში.

ირანის სახელმწიფო ტელევიზიის ცნობით, ქალაქის მთავარი საავადმყოფო ძლიერ დაზიანდა, რის შედეგადაც ასეულობით ადამიანისთვის მკურნალობის გაწევა გაჭირდა.

ირანული მედიის ცნობით, ქალაქ სარპოლ-ე ზაჰაბში ქალი და მისი მცირეწლოვანი შვილი ნანგრევებიდან ცოცხლად ამოიყვანეს.

ზოგიერთ ქალაქს სასმელი წყალი და ელექტროენერგია არ მიეწოდება და შენობების ჩამონგრევის შემდეგ ადამიანები იძულებული გახდნენ საათები ღია ცის ქვეშ, პარკებსა და ქუჩებში, ცივ ამინდში გაეტარებინათ.