საქართველოს მორაგბეთა ეროვნულ ნაკრებსა და უელსელებს შორის უელსის დედაქალაქ კარდიფში გამართული მეორე ტესტ-მატჩის პირველივე წუთები უელსელების უპირატესობით წარიმართა და ქართველების დაჯარიმების შემდეგ, მასპინძლების მიერ შესრულებული საჯარიმო დარტყმის შედეგად ანგარიში 3:0 გახდა.

უელსელები მე-20 წუთზე კიდევ უფრო დაწინაურდნენ და ჰალამეიმოსის მერ დადებული ლელოს, შემდეგ კი ზუსტად შესრულებული გარდასახვის შედეგად 21-ე წუთზე უელსელებმა 10-ქულიანი უპირატსობა მოიპოვეს, 26-ე წუთზე კი მათ მორიგი ლელოს დადეს, თუმცა ვიდეომსაჯმა იგი წინპასის გამო არ ჩათვალა, 27-ე წუთზე კი სოსო მათიაშვილმა საჯარიმო დარტყმა ზუსტად შეასრულა და ანგარიში 10:3 გახდა. სწორედ ამ ანგარიშით დასრულდა შეხვედრის პირველი ნახევარი.

მეორე ნახევარში ქართველებმა გაცილებით თავდაჯერებული და შემტევი თამაში აჩვენეს, თავდაპირველად ანგარიშში სხვაობა 4 ქულით შეამცირეს, თუმცა 62-ე წუთზე მასპინძლებმა მორიგი ჯარიმა ზუსტად შეასრულეს და ანგარიში 13:6 გახდა.

70-ე წუთზე, როცა ქართველებს ლელოს დადებამდე 3-4 მეტრიღა აცილებდათ, უელსელები დაჯარიმდნენ, შერკინების შემდეგ კი მსაჯმა მასპინძლები ისევ დააჯარიმა და კვლავ 2 შერკინება შედგა და ამჯერად ქართველები დაჯარიმდნენ.

ამის შემდეგ ქართველებმა კვლავ შემტევი თამაში აჩვენეს, მასპინძლების კარებთან ბოლო წამებზე შერკინებაც დაინიშნა, ლელომდე სულ რაღაც მეტრი რჩებოდა, თუმცა ქართველები დაჯარიმდნენ და მსოფლიოს ერთ-ერთ უძლიერეს გუნდთან გამარჯვება ვერ შეძლეს.

საბოლოოდ, უელსმა საქართველო ანგარიშით 13:6 დაამარცხა.