თერჯოლის მუნიციპალიტეტში მეოთხე მოწვევის საკრებულოს პირველი სხდომა გაიმართა. როგორც GUARDIAN.GE-ს თერჯოლის საკრებულოდან აცნობეს, სხდომაზე „ქართული ოცნება-დემოკრატიული საქართველო“-ს წარდგინებით, საკრებულოს თავმჯდომარედ პოროპორციული სიის პირველი ნომერი ნინო ჯანელიძე დაასახელეს და ფარული კენჭისყრით აირჩიეს.

„მინდა უღრმესი მადლობა გადაგიხადოთ კოლეგებო, ასევე მინდა მადლობა გადავუხადო ამომრჩეველს გამოცხადებული ნდობისათვის. ჩვენ გვექნება ახლო და მუდმივი კომუნიკაცია მათთან და არ განვიხილავთ მხოლოდ ამომრჩევლის განზომილებით, რომელიც ოთხ წელიწადში ერთხელ ახსენდებათ ხოლმე. მივესალმები, ჩვენს ოპოზიციონერ კოლეგებს, მათთან გვექნება კონსტრუქციული და კორექტული ურთიერთობა. ჩვენს მიერ მიღებული გადაწყვეტილებები იქნება ღია და საჯარო. ჩვენ დავამკვიდრებთ ურთიერთობის და საქმის კეთების ახალ სტანდარტს. აქვე, მადლობა მინდა გადავუხადო მესამე მოწვევის საკრებულოს გაწეული მუშაობისა და თანამშრომლობისათვის“, განაცხადა ნინო ჯანელიძემ, რომელმაც მოადგილის კანდიდატურად ნოდარ ფანჩულიძე დაასახელა, წარმოდგენილი კანდიდატურა, ფარული კენჭისყრის საფუძველზე, ხმათა უმრავლესობით იქნა მხარდაჭერილი.

სხდომაზე აირჩა სამანდანტო და ხმისდამთვლელი დროებითი კომისიები, მათი რეკომენდაციის საფუძველზე მოხდა წარმომადგენლობითი ორგანოს წევრთა უფლებამოსილების ცნობა.

2017 წლის 21 ოქტომბრის ადგილობრივი თვითმმართველობის არჩევნების შედეგების გათვალისწინებით, მუნიციპალიტეტის 35 წევრიან საკრებულოში 29 „ქართული ოცნება-დემოკრატიული საქართველოს“, 4- „ევროპული საქართველოს“, 1- „ერთიანი ნაციონალური მოძრაობის“ , 1- „პატრიოტთა ალიანსის“ წარმომადგენელი იქნება.