სუს-ის სპეცოპერაციის დასრულების შემდეგ კახა კალაძემ გაბრიელ სალოსის ქუჩის დაზარალებულ მცხოვრებლებს დახმარება შესთავაზა.

თბილისის მერის განცხადებით, მერია გაბრიელ სალოსის გამზირზე მცხოვრებლებს, საჭიროების შემთხვევაში, დროებითი საცხოვრებელი ფართებით უზრუნველყოფს. 

განცხადება კალაძემ რამდენიმე წუთის წინ საგანგებოდ გამართულ ბრიფინგზე გააკეთა.

„მწუხარებას გამოვთქვამ სპეცდანიშნულების რაზმის წევრის გარდაცვალების გამო და ვუსამძიმრებ მის ოჯახს, ახლობლებს და სრულიად საქართველოს.

ამ ეტაპზე რაც ყველაზე მთავარი და მნიშვნელოვანია, სრულად არის დაცული და უზრუნველყოფილი ჩვენი მოქალაქეების უსაფრთხოება. ოჯახები, რომლებიც ცხოვრობენ გაბრიელ სალოსის გამზირზე, მიმდებარე კორპუსებში გვინდა დავამშვიდოთ და ვუთხრათ, რომ არც ერთი მათგანი არ დარჩება ყურადღების მიღმა. მერია, რასაკვირველია, იზრუნებს საკუთარ მოსახლეობაზე და საჭიროების შემთხვევაში, აუცილებლად უზრუნველყოფს მათთვის დროებით საცხოვრებელ ფართებს. ვთხოვთ მოსახლეობას, ვისაც აქვს დროებითი ფართების საჭიროება, დროულად მიმართოს ისნის გამგეობას, რათა მოხდეს მათი რეგისტრაცია და დროებით საცხოვრებელ ფართებში გადაყვანა. ისნის გამგეობა მუშაობს საგანგებო რეჟიმში. დაინტერესებულ პირებს შეუძლიათ დაუკავშირდნენ ისნის გამგეობას ნომერზე: 2 37 50 29, 599 53 70 40, ასევე დარეკონ მერიის ცხელ ნომერზე 2 72 22 22 ", განაცხადა კალაძემ საგანგებო ბრიფინგზე.