აფხაზეთის ავტონომიური რესპუბლიკის უმაღლესი საბჭო შეშფოთებას გამოთქვამს ოკუპირებული აფხაზეთის ტერიტორიაზე მოსახლეობისადმი დისკრიმინაციული დამოკიდებულების გამო, რომელსაც გალის რაიონის სოფელ ბარღების მკვიდრის, 13 წლის მოზარდ ლევან ცაავას სიცოცხლე ემსხვერპლა.


როგორც აფხაზეთის უმაღლესი საბჭოს განცხადებაშია აღნიშნული მიუხედავად იმისა, რომ ეს ტრაგიკული ფაქტი ენგურსგაღმა და გამოღმა საქართველოში განსხვავებული ინტერპრეტაციებით ვრცელდება, ვერავინ უარყოფს, რომ ოკუპირებულ აფხაზეთში მცხოვრებ მოქალაქეებს აფხაზეთის უკანონო, დე-ფაქტო ხელისუფლება ყოველმხრივ ზღუდავს და ელემენტარულ უფლებებს ართმევს, რის გამოც არაერთხელ დამდგარა ასეთი ტრაგიკული შედეგი.


„დროა, მსგავსი უბედურების პრევენციისთვის აფხაზეთის ტერიტორიაზე მცხოვრებ ჩვენს მოქალაქეებს ეროვნების, სარწმუნოების, სქესისა თუ ასაკის მიუხედავად, მიეცეთ უფლება, როცა საქმე ადამიანის სიცოცხლისა და ჯანმრთელობის დაცვას ეხება, ყოველგვარი ბარიერის გარეშე გადალახონ ე.წ. საზღვარი აფხაზეთსა და დანარჩენ საქართველოს შორის“,-ნათქვამია განცხადებაში.


აფხაზეთის ავტონომიური რესპუბლიკის უმაღლესი საბჭო ჟენევისა თუ სხვა ფორმატის საერთაშორისო ფორუმების მონაწილეებს მოუწოდებს, აფხაზეთის პრობლემასთან დაკავშირებით, ეს საკითხი უახლოეს შეხვედრაზე პრინციპულად განიხილონ, შესაბამისი – ჰუმანური გადაწყვეტილება მიიღონ და ამით აფხაზეთში ადამიანის სიცოცხლის ხელშეუვალი უფლების დაცვას ხელი შეუწყონ.


მიმდინარე წლის, 4 მაისს 13 წლის მოზარდი, რომელიც რუსმა ოკუპანტებმა საქართველოს მიერ კონტროლირებად ტერიტორიაზე არ გადმოუშვეს, ჯანმრთელობის მდგომარეობის გაუარესების შედეგად გარდაიცვალა. მოზარდი გალის საავადმყოფოში მკურნალობდა, მდგომარეობის გართულების შემდეგ, მისი ზუგდიდში გადმოყვანა გახდა საჭირო, თუმცა, ე.წ. საშვის არქონის გამო, ის ენგურის ხიდზე არ გადმოუშვეს.


გავრცელებული ინფორმაციით, ბავშვის ენგურზე გადასვლისთვის, ოკუპანტებმა 500 ლარი ან სპეციალური მოწმობა მოითხოვეს. მათი არ ქონის გამო, მშობლებმა მოზარდის ზუგდიდში გადმოყვანა შემოვლითი გზით სცადეს, თუმცა, ბავშვი გზაში გარდაიცვალა.