„ამ ეტაპზე, მივცეთ საშუალება ძალოვნებს, რომ თავისი საქმე გააკეთონ“, - ასე უპასუხა საქართველოს პარლამენტის თავმჯდომარის პირველმა მოადგილემ, თამარ ჩუგოშვილმა შეკითხვას, რამდენად საჭიროდ მიიჩნევს გაბრიელ სალოსის ქუჩაზე ჩატარებული სპეცოპერაციის საპარლამენტო ფორმატში განხილვას.

პარლამენტის პრესსამსახურის ცნობით, თამარ ჩუგოშვილმა გარდაცვლილი სპეცრაზმელის ოჯახის წევრებს მიუსამძიმრა და აღნიშნა, რომ ახლა პოლიტიკური სპეკულაციების დრო არ არის.

„ვიზიარებ გარდაცვლილი პოლიციელის ოჯახის წევრების მწუხარებას. ძალიან მძიმე და სამწუხარო ფაქტი იყო. მგონი, არ არის ეს ის მომენტი, როდესაც სხვადასხვა პირები პოლიტიკური სპეკულაციებით უნდა იყვნენ დაკავებულები და პოლიტიკურ ქულებს უნდა იწერდნენ, როდესაც ასეთი მძიმე ფაქტი მოხდა და ჩვენს სამართალდამცავებს ჩვენი ქვეყნის და საზოგადოების უსაფრთხოების დაცვა თავისი სიცოცხლის ფასად მოუხდათ. ამ ეტაპზე ძალოვნებს მივცეთ საშუალება, რომ თავისი საქმე გააკეთონ“, განაცხადა პარლამენტის თავმჯდომარის პირველმა მოადგილემ.