ხულოს მუნიციპალიტეტში დიდთოვლობის გამო პრობლემები შეიქმნა. შეფერხებაა როგორც გადაადგილების, ისე ელექტრომომარაგების კუთხით. უამინდობის გამო, სასწავლო პროცესი 8 საჯარო სკოლასა და 4 საბავშვო ბაღში გადაიდო.

ხულოს მერიის პრესსამსახურის ცნობით, მუნიციპალიტეტში არსებული ყველა შესაბამისი უწყება და მერიაში მოქმედი საგანგებო შტაბი მერის, გოჩა მელაძის ხელმძღვანელობით სრულ მზადყოფნაშია და საჭიროების შემთხვევაში არსებული პრობლემის ადგილზე შესწავლა მიმდინარეობს.

„უამინდობის გამო გარკვეული შეფერხებები შეიქმნა გადაადგილებასთან დაკავშირებით, თუმცა, მოცურების საწინააღმდეგო ჯაჭვების გამოყენებით ტრანსპორტი გადაადგილდება. მობილიზებულია როგორც მერიის, ისე აჭარის საავტომობილო გზებისა და სამელიორაციო სისტემების მართვის დეპარტამენტის მძიმე ტექნიკა. ამ დროისათვის გაწმენდით სამუშაოებს 17 ერთეული ტექნიკა ახორციელებს. შეფერხებები შექმნილია ელექტროენერგიის მიწოდების კუთხითაც, თუმცა აქტიურად მუშაობს „ენერგო-პრო ჯორჯიას“ ბრიგადები და უახლოეს პერიოდში არსებული შეფერხებებიც აღმოიფხვრება", აცხადებენ ხულოს მერიაში.

ხულოს მუნიციპალიტეტში უკვე მესამე დღეა ინტენსიურად თოვს. ამ დროისათვის თოვლის საფარმა გოდერძის უღელტეხილზე 1,2 მეტრს, მაღალი ზონის სოფლებში 60-70 მ-ს, ხოლო დაბლობში 30-40 სმ-ს მიაღწია.