პარლამენტის ვიცე სპიკერი გიორგი ვოლსკი მიიჩნევს, რომ თბილისში, ბერი გაბრიელ სალოსის ქუჩაზე ჩატარებული სპეცოპერაციის საქმესთან დაკავშირებით საკანონმდებლო ორგანოში ძალოვანი მინისტრები უნდა მივიდნენ.

„არავინ იცის, ეს არის თუ არა ჩატაევი. ანტიტერორისტულ ბრძოლაში ჩართული ქვეყნის ინტერესია, რომ ამ მიმართულებით ერთიანი სტრატეგია იყოს და ეს საერთო ბრძოლაში მხოლოდ ეპიზოდია, რაც გვაქვს. არ შეიძლება, ამ საკითხთან დაკავშირებით ზედაპირული განცხადებები გაკეთდეს ან დახურულ სხდომაზე, ან ღია სხდომაზე. საზოგადოებას არასწორი, ან ნაწილობრივი ინფორმაცია არ უნდა მიეწოდოს. მეგონა, რომ ოპოზიციას ამ თემის სერიოზულობა გათთვიცნობიერებული ჰქონდა, რადგან ოპოზიციის ზოგიერთმა წარმომადგენელმა სერიოზული განცხადება გააკეთა, რომ ქართველ და ამერიკელ ექსპერტებს ერთობლივ მუშაობაში ხელი არ უნდა შეეშალოს. როგორც ჩანს, გადაწყვიტეს, რომ სჯობს, პოლიტიკური სპეკულაციების ფორმატს დაუბრუნდნენ“, განაცხადა ვოლსკიმ და დასძინა: „მინისტრები აუცილებლად უნდა მოვიდნენ. არ ვიცი, როგორ ფორმატში. ალბათ, დახურულ ფორმატში, მაგრამ მხოლოდ მას შემდეგ, რაც პარტნიორებთან ერთად გარკვეულ დასკვნებამდე მივალთ. ყველა შემთხვევაში უნდა ვიცოდეთ, რომ მოწინააღმდეგე მხარე აანალიზებს ყველა გამონათქვამს, ყველა შეხედულებას და თუნდაც ზერელე განცხადებას“.