ახალი ბაღი საზეიმო ვითარებაში ქვემო ქართლში სახელმწიფო რწმუნებულ-გუბერნატორმა გრიგოლ ნემსაძემ, გარდაბნის მუნიციპალიტეტის მერმა რამაზ ბუდაღაშვილმა და საკრებულოს თავმჯდომარემ ტარიელ ჯანხოთელმა გახსნეს.

ღონისძიებას გარდაბნის საკრებულოს ფრაქცია „ქართული ოცნება – დემოკრატიული საქართველოს“ თავმჯდომარე ზაზა ონიანი, სოციალურ საკითხთა კომისიის თავმჯდომარე ლევან ნიჟარაძე, ქონების მართვისა და ბუნებრივი რესურსების კომისიის თავმჯდომარე გენადი იორდანაშვილი, საკრებულოს დეპუტატი ბახტიარ ზეინალოვი, მერის მოადგილე დუნიამალ გაჯიევი, ბაგა–ბაღების გაერთიანების ხელმძღვანელი ჯემალ დავითაძე და მუნიციპალიტეტის წარმომადგენლები ესწრებოდნენ.

გარდაბნის საკრებულოს პრესსამსახურის ინფორმაციით, სოფელ მუღანლოში არსებული საბავშვო ბაღი ამორტიზებული იყო, რის გამოც დემონტაჟს დაექვემდებარა და საჭირო გახდა ახალი სკოლამდელი დაწესებულების აშენება.

ახალი საბავშვო ბაღი სამი ჯგუფისგან შედგება, რომელიც ასამდე აღსაზრდელს მოემსახურება.

მუღანლოს საბავშვო ბაღის მშენებლობა ორ ეტაპად მიმდინარეობდა. პირველი ეტაპის სამშენებლო სამუშაოები რეგიონული განვითარების ფონდიდან 157 300 ლარით, ხოლო მეორე ეტაპის – ადგილობრივი ბიუჯეტიდან 252 000 ლარით დაფინანსდა.

ახალი ბაღის სამშენებლო სამუშაოები, რომლის საერთო ღირებულება 409 300 ლარია, სამშენებლო კომპანია შპს „პარმაღმა“ შეასრულა.