წალენჯიხის მუნიციპალიტეტის გამგებელს გოგა გულორდავას ადგილობრივი მოსახლეობის ერთი ნაწილი არაკომპეტენტურობაში, კორუფციასა და მოქალაქეთა ინტერესებისადმი გულგრილობაში ადანაშაულებს.


როგორც guardian.ge-სთან საუბარში წალენჯიხის მუნიციპალიტეტის ერთ-ერთ სოფელში მცხოვრები ქალბატონი (რედ: სახელს და გვარს შეგნებულად არ ვასახელებთ) აცხადებს, ასეთი უპასუხისმგებლო გამგებელი წალენჯიხას არასოდეს ჰყოლია.


"ელემენტარულად მას, მიღების საათებიც კი არ აქვს ნორმალურად განსაზღვრული. მისი კაბინეტის კარებთან გაკრულ აბრაზე მითითებული კი აქვს მიღების დრო და საათები, მაგრამ თქვენ წარმოიდგინეთ, მას თბილისისა და ზუგდიდისკენ მიმავალ გზაზე ან კიდევ, გაშლილ სუფრაზე უფრო წააწყდებით, ვიდრე მის კაბინეტში, ჩვენს სოფელში ხომ საერთოდ ფეხი არ დაუდგამს რამდენი ხანია, მხოლოდ წინასაარჩევნო პერიოდში გახლდათ," - ამბობს შუახნის ქალბატონი, რომელსაც არანაირი იმედი არ აქვს, რომ წალენჯიხის ახლანდელი გამგებლის პირობებში რაიმე სასიკეთოდ შეიცვლება მისი სოფლის მცხოვრებთათვის.


წალენჯიხის გამგებლის შესახებ ერთ–ერთი ადგილობრივი მეწარმე კი ასეთ რამეს ამბობს: ,, წალენჯიხაში თუ ხელმძღვანელობასთან დაახლოვებული პირი არ ხარ, შეუძლებელია რაიმე ტენდერში გაიმარჯვო. მე, 4 - ჯერ მივიღე მონაწილეობა, მართალია ეს სულ რაღაც მცირე ტენდერები იყო, მაგრამ გულორდავამ ყველგან მისიანებს გაამარჯვებინა.  იმას მაინც უნდა მიხვდეს ეს ხელისუფლება, რომ ასეთი არაპროფესიონალი და კორუფციაში ამოთხვრილი პიროვნება, რომელიც ნასამართლევია ქრთამის აღების ფაქტზე, არ უნდა წარადგინო ისეთ საპასუხისმგებლო თანამდებობაზე, როგორიც გამგებლის პოსტია. როგორ შეიძლება ასეთი გამგებელი, როგორც წალენჯიხას ჰყავს, ერთი წუთითაც კი გააჩერო თანამდებობაზე და ამდენი ადამიანის ბედის გადაწყვეტა მიანდო. ხომ გაგიგიათ, როგორც ძაღლის კუდი არ გასწორდების, ასევე მაგ გულორდავას გამოსწორებაც არ იქნება", -აცხადებს ადგილობრივი მეწარმე.


წალენჯიხის მოსახლეობის ერთი ნაწილის სატკივარისა და გამგებლისადმი გამოხატული პრეტენზიების თაობაზე კომენტარის ჩაწერას guardian.ge თავად გოგა გულორდავასთან ეცადა, მაგრამ იგი სამუშაო საათებში არც სამსახურში იმყოფებოდა და არც სატელეფონო ზარებს პასუხობდა.