თბილისის 51-ე სკოლის მიმდებარე ტერიტორიაზე, ხორავას ქუჩის ერთ-ერთი საცხოვრებელი კორპუსის ეზოში მომხდარი მკვლელობის საქმესთან დაკავშირებით განცხადებას ავრცელებს მთავარი პროკურატურის ადამიანური რესურსების მართვის უფროსის მოადგილე მირზა სუბელიანი, რომელიც ადასტურებს, რომ მისი შვილი „ნამდვილად იყო შემსწრე მომხდარი უბედურების“ და იგი თავის შვილთან ერთად 1-ელ დეკემბერსვე გამოცხადდა პოლიციის სამმართველოში, სადაც მისმა „შვილმა გამომძიებლებს მისცა ამომწურავი ჩვენება და თანამშრომლობს გამოძიებასთან“, ხოლო თავად კი მიიღო გადაწყვეტილება საქართველოს მთავარი პროკურორისადმი განცხადებით მიმართვის თაობაზე, გათავისუფლებულ იქნას დაკავებული თანამდებობიდან.

„იმედი მაქვს, რომ ამ გადაწყვეტილების შემდეგ მაინც დაასრულებენ სპეკულაციებს და საგამოძიებო ორგანოს ნორმალურ გარემოში ექნება შესაძლებლობა დაადგინოს ჭეშმარიტება. დარწმუნებული ვარ, რომ სიმართლე ძალიან მალე დადგინდება და გამოძიება ყველა კითხვას გასცემს ამომწურავ პასუხს“, აცხადებს სუბელიანი.

იგი თბილისში მომხდარი ტრაგედიის გამო, რომლის დროსაც ორი მოზარდი გარდაიცვალა, მწუხარებას გამოთქვამს და სამძიმარს უცხადებს „მათ მშობლებსა და მეგობრებს“.

„გამაოგნებელი და უაღრესად შემაშფოთებელია ახალგაზრდებს შორის მსგავსი დაპირისპირება და ის ტრაგიკული შედეგი, რამაც მთელი საზოგადოება და მათ შორის მეც, შოკში ჩაგვაგდო. ჩემდა სამწუხაროდ, ამ უმძიმეს შემთხვევას ადამიანების გარკვეულმა ჯგუფებმა ჩემი სახელი და გვარი დაუკავშირეს, შეგნებულად დაამახინჯეს ფაქტები და საზოგადოებას მიაწოდეს მცდარი ინფორმაცია“, ნათქვამია მირზა სუბელიანის განცხადებაში.