Cathay Pacific-ის თვითმფრინავის ეკიპაჟის წევრებმა, რომლებიც იაპონიის თავზე მიფრინავდნენ, უეცრად, ჩრდილოეთ კორეის მიერ გაშვებული რაკეტა დაინახეს, განაცხადა ავიახაზებმა.

კომპანიამ დაუდასტურა BBC-ს, რომ ეკიპაჟის წევრები მომსწრე გახდნენ იმისა, „რაც სავარაუდოდ ხელახლა შემოსვლა“ იყო რაკეტისა დედამიწის ატმოსფეროში.

30 ნოემბერს ჩრდილოეთ კორეამ ახალი კონტინენტთშორისი ბალისტიკური რაკეტა გამოსცადა, რომელსაც ფხენიანის მტკიცებით, შეერთებული შტატების კონტინენტზე ნებისმიერ წერტილში წვდომის შესაძლებლობა აქვს.

რაკეტის გაშვებამ ორშაბათს აშშ-ისა და მისი მოკავშირის, სამხრეთ კორეის მასშტაბური, ყველაზე დიდი ერთობლივი საჰაერო წვრთნების დაწყება განაპირობა, რასაც ფხენიანმა „სრული პროვოკაცია“ უწოდა.

ჩრდილოეთ კორეის მიერ მის „ყველაზე მძლავრ“ რაკეტად აღწერილმა „ჰვასონგ-15“-მა, რომელმაც მანამდე გაშვებულ რაკეტებზე ყველაზე მაღლა იფრინა, 4 475 კმ სიმაღლეს მიაღწია, 53 წუთში 950კმ გაიარა და იაპონიის წყლებში ჩავარდა.

South China Morning Post-ის თანახმად, Cathay-ის ოპერაციების გენერალურმა მენეჯერმა მის თანამშრომლებს შეტყობინების სახით უთხრა, რომ „დღესCX893-ის ეკიპაჟის წევრებმა მოახსენეს, ‘იყავით ინფორმირებული, ჩვენ ვიხილეთ კორეის სახალხო-დემოკრატიული რესპუბლიკის რაკეტის აფეთქება და ნაწილებად დაშლა ჩვენი ახლანდელი ადგილმდებარეობის სიახლოვეს’“.

გავრცელებული ცნობებით, რაკეტა ასევე იხილა ორმა სამხრეთ კორეულმა თვითმფრინავმა, რომლებიც სეულიდან შეერთებულ შტატებში მიფრინავდნენ.