„ერთიანი ნაციონალური მოძრაობის" წარმომადგენელი ზაზა ბიბილაშვილი უკრაინაში საქართველოს ყოფილი პრეზიდენტის, მიხეილ სააკაშვილის დაკავების ფაქტს ეხმაურება და აცხადებს, რომ მისი დაკავება შედეგია იმის, რომ ბიძინა ივანიშვილი და პეტრო პოროშენკო „შეიკრნენ".

ბიბილაშვილი ამბობს, რომ სწორედ ამით აიხსნება ის, რომ თავის დროზე, „სამჯერ გააგზავნა ამ ხელისუფლებამ უკრაინაში ექსტრადირების მოთხოვნა და სამჯერვე მიიღო უარი ძალიან მარტივი მიზეზით - ბავშვისთვისაც ნათელია, რომ ამ მოთხოვნის უკან იყო პოლიტიკური ინტერესები და პოლიტიკური დაკვეთა. რა შეიცვალა ამის შემდეგ? შეიცვალა მხოლოდ ის, რომ ივანიშვილი და პოროშენკო შეიკრნენ, რათა საკუთარი ოლიგარქიული ინტერესები გადაერჩინათ, საკუთარი ბიზნესები გადაერჩინათ, უნდათ პოსტსაბჭოთა სივრცეში მთავარი ანტიკორუფციული, მთავარი ანტირუსული პოლიტიკოსის, ამ ფრონტის ლიდერის, მიხეილ სააკაშვილის იზოლირება".

ბიბილაშვილის თქმით, „ნაციონალური მოძრაობა" ყველა ტიპის სცენარის განვითარებისთვის მზად არის.

„მე არ მინდა სპეკულირება იმაზე, თუ რა მოხდება, მაგრამ ჩვენ ძალიან ყურადღებით ვადევნებთ თვალს პროცესებს და რაც არ უნდა მოხდეს, ყველანაირი სცენარისთვის მზად ვართ", განუცხადა ტელეკომპანია „იმედს" ზაზა ბიბილაშვილმა.