საქართველოს ყოფილი პრეზიდენტი, ოდესის ოლქის ყოფილი გუბერნატორი მიხეილ სააკაშვილი უკრაინის ნაციონალური პოლიციის ერთ-ერთი დეპარტამენტის ხელმძღვანელის ბინაში დააკავეს. უკრაინული სააგენტო სააგენტო LB.ua და ტელეკომპანია TCH ავრცელებენ ინფორმაციას, რომ დაკავება პოლკოვნიკ იური პოკინბოროდას ბინაში მოხდა.
პოკინბოროდა 2015 წლის ოქტომბრიდან 2016 წლის მაისამდე ლუგანსკის ოლქის პოლიციის სამმართველოს ხელმძღვანელობდა. 2016 წელს კი, ნაციონალური პოლიციის ერთ-ერთ დეპარტამენტს ჩაუდგა სათავეში.
სააკაშვილის დაკავებასთან დაკავშირებით უკრაინის ნაციონალური პოლიციის პრესსამსახური განცხადებას ავრცელებს.
„დაკავება ქალაქ კიევის სოლომენსკის რაიონში მოხდა. ეს უკანასკნელი გადავეცით სისხლის სამართლის წარმოების საგამოძიებო ორგანოს. პოლიციის თანამშრომლები კონსტიტუციის მოედანზე კარვების ქალაქის ტერიტორიაზე არ შესულან. საზოგადოებრივი წესრიგის დაცვისკენ მიმართული რამე სახის ზომები არ გატარებულა“, ნათქვამია უკრაინის ნაციონალური პოლიციის პრესსამსახურის განცხადებაში.