კონკურენციის სააგენტოს თავმჯდომარის, ნოდარ ხადურის განცხადებით, სააგენტო კომპანია „სიტროენ ჯორჯიას“ საჩივართან დაკავშირებით მოკვლევას ყველა ინფორმაციის მიღებამდე ვერ დაიწყებს.

მისი თქმით, სააგენტოში საჩივარი 12 დეკემბერს შევიდა, 13 დეკემბერს, საჩივარი სააგენტომ გადაუგზავნა მხარეებს, რომლებსაც ეხებათ, რათა მათგანაც მიიღონ ინფორმაცია.

როგორც ხადურმა ჟურნალისტებს განუცხადა, მოკვლევის დასაწყებად, ერთთვიანი ვადა აქვთ, იმ შემთხვევაში, თუ მოპასუხე მხარეებისგან ყველა საჭირო ინფორმაციას ერთ თვეზე უფრო ნაკლებ დროში მიიღებენ, მაშინ, მოკვლევა უფრო ადრე დაიწყება.

„ჩვენ გავუგზავნეთ წერილი „სიტროენ ჯორჯიას” და მოვითხოვეთ გარკვეული ინფორმაციის დაზუსტება. ეს სასამართლოს თემას ეხება, ვინაიდან სასამართლოდან მიმდინარეობს განხილვა და გვაინტერესებს. ჩვენ მივიღებთ გადაწყვეტილებას მოკვლევის დაწყების შესახებ და პროცესი იქნება ძალიან საჯარო. მოკვლევა ვერ დაიწყება, სანამ ყველა ინფორმაციას ვერ მივიღებთ. მოკვლევის დაწყებისთვის ერთთვიანი ვადა გვაქვს და თუ მანამდე მივიღეთ ინფორმაცია მოპასუხე მხარეებისგან და თავად „სიტროენ ჯორჯიასგან“, შევეცდებით, უფრო ადრე დავიწყოთ მოკვლევა. პრემიერ მინისტრთან ამ საკითხზე არ გვქონია საუბარი“, განაცხადა ნოდარ ხადურმა.

კომპანია „სიტროენ ჯორჯია“ სახელმწიფო შესყიდვების სააგენტოს უკანონო გადაწყვეტილებას ედავება და კარტელური გარიგებების არსებობაზე საუბრობს.