ისტორიულ ხეს, რომელიც თეთრი სახლის ეზოში თითქმის 200 წლის განმავლობაში იდგა, უსაფრთხოებიდან გამომდინარე, გარკვეულ ნაწილებს მოაცილებენ.

მაგნოლია „ჯექსონი“ პრეზიდენტმა ენდრიუ ჯექსონმა მისი გარდაცვლილი მეუღლის სახსოვრად დარგო.

ის ისტორიული ცერემონიების ფონად არაერთხელ ყოფილა გამოყენებული და 1928 წლიდან 1988 წლამდე 20-დოლარიან ბანკნოტებზეც კი იყო გამოსახული.

მაგრამ, როგორც BBC იუწყება, ექსპერტები ამბობენ, რომ ხე დაზიანებულია და საფრთხის რისკებს შეიცავს. პირველმა ქალბატონმა მელანიამ მოუწოდა, რომ ხის დიდი ნაწილი მოცილებული იქნას.

თეთრი სახლის წარმომადგენლის, სტეფანია გრიშეს თქმით, ქალბატონმა ტრამპმა ითხოვა, რომ ნერგები შენარჩუნებულ იქნეს, რომ იმავე ადგილას ახალი ხის ხელახლა დარგვის შესაძლებლობა იყოს.

მისივე თქმით, მელანია ტრამპმა აღნიშნული გადაწყვეტილება იქედან გამომდინარე მიიღო, რომ ხე საფრთხეს უქმნიდა „ვიზიტორებს და პრესის წარმომადგენლებს, რომლებიც ხშირად, პირდაპირ მის წინ დგანან“, როდესაც საპრეზიდენტო ვერტმფრენის აფრენა ხდება.

მაგნოლიის ხის ცხოვრებამ 39 პრეზიდენტის ხანა მოიცვა და ის თეთრ სახლში ამერიკის სამოქალაქო ომის დროს და ორი მსოფლიო ომის პერიოდშიც იდგა.

ექს-პრეზიდენტის, ბილ კლინტონის ქალიშვილმა, ჩელსა კლინტონმა „თვითერზე“ მადლობა გადაუხადა მათ, ვინც მაგნოლიის ხეს წლების განმავლობაში უვლიდა და ასევე ქალბატონ ტრამპს, მისი ხელახლა დარგვის გეგმების გამო.