სულ მცირე 40 ადამიანი იქნა მოკლული და 30-ს ჭრილობები აქვს მიყენებული, ავღანეთის დედაქალაქ ქაბულის დასავლეთში შიიტების კულტურულ და რელიგიურ ორგანიზაციაზე თვითმკვლელი ტერორისტის მიერ განხორციელებული თავდასხმისას.

როგორც BBC-ს ქვეყნის შინაგან საქმეთა სამინისტროში განუცხადეს, თვითმკვლელის მიერ განხორციელებულ აფეთქებას წინ უძღოდა იმავე ადგილას მომხდარი ორი სხვა აფეთქება.

ჯერჯერობით არც ერთ დაჯგუფებას არ აუღია მომხდარზე პასუხისმგებლობა.

ბოლო თვეებში, ავღანეთის გასწვრივ, შიიტები ე.წ. ისლამური სახელმწიფოს სამიზნე არაერთხელ გამხდარან.

როგორც ამ დროისთვისაა გამოკვეთილი, ტერორისტების სამიზნე „ტაბაიანის“ კულტურული ცენტრი იყო, თუმცა მის ახლომდებარედ ახალი ამბების სააგენტო „ავღანეთის ხმის“ ოფისებიცაა განლაგებული.

შიიტების კულტურულ და რელიგიურ ცენტრში ფორუმზე საკითხების განსახილველად, სხვებთან ერთად, სტუდენტებიც იმყოფებოდნენ.

შინაგან საქმეთა სამინისტრომ განაცხადა, რომ ღონისძიება საბჭოთა კავშირის მიერ ავღანეთის დაპყრობის 38-ე წლისთავს ეძღვნებოდა.

სტუდენტმა მუჰამედ ჰასან რაზაიმ „ტოლო ნიუსს“ უთხრა: აფეთქების შემდეგ ცეცხლი გაჩნდა, შენობის შიგნით კვამლი დადგა და ყველა დახმარებას ივედრებოდა“.

„ავღანეთის ხმის“ ჟურნალისტმა, საიედ აბას ჰუსეინმა „როიტერსს“ უთხრა, რომ სააგენტოს ერთი რეპორტიორი დაიღუპა და ორმა სხვამ ჭრილობები მიიღო.