ხონის მერიის სააქტო დარბაზში მუნიხიპალიტეტის მერის, ლადო ჯურხაძის ინიციატივით, ადგილობრივ მეფუტკრეებთან შეხვედრა გაიმართა, რომელსაც მოწვეული ექსპერტი, საქართველოს პროფესიონალ მეფუტკრეთა ასოციაციის პრეზიდენტი თეიმურაზ ღოღობერიძე ესწრებოდა.

ხონის მერიის პრესსამსახურის ცნობით, შეხვედრაზე მეფუტკრეობის დარგის განვითარების ხელშემწყობ მიმდინარე პროექტებზე, თაფლის ხარისხის გაუმჯობესების აუცილებლობაზე, დამზადების თანამედროვე პროცედურებზე, ფუტკრის წამლობის უახლეს მედიკამენტებსა და თაფლის ექსპორტის შესაძლებლობებზე ისაუბრეს.

ლადო ჯურხაძემ მეფუტკრეებს ასოციაციის შექმნის იდეა მიაწოდა.

„ასოციაცია, ერთგვარი იურიდიული ფორმაა, რომელიც ნაკლებ ვალდებულებებს გულისხმობს და მეტ შესაძლებლობებს მოგცემთ. ტრეინინგები, გადამზადების კურსები, ინფორმაციის მარტივად გაცვლის შესაძლებლობა, საუკეთესო გამოცდილების გაზიარება, ერთი გაერთიანების წევრობა, ერთობა სასიკეთოდ წაადგება თქვენს საქმიანობას. მარტო არ უნდა დარჩეთ პრობლემებთან, მოგვმართეთ, თქვენი გადაუჭრელი საკითხი ჩვენთვის პრიორიტეტული თემაა. ეს შეხვედრა შეხვედრისთვის არ დამიგეგმავს, მინდა თითოეულ თქვენგანს ვიცნობდე, თითოეულის პრობლემა ვიცოდე, რომ მოგვარების გზებზე ერთობლივად ვიზრუნოთ. ბიზნესსექტორთან მექნება მუდმივი კავშირი თაფლის რეალიზაციის საკითხებთან დაკავშირებით. ხონს ამ მიმართულებით აქვს დიდი პოტენციალი და ჩვენ ეს უნდა გამოვიყენოთ", განაცხადა ლადო ჯურხაძემ.

შეხვედრის ერთ-ერთი მნიშვნელოვანი თემა იყო აზიური მავნებელი მწერი ფაროსანას წინააღმდეგ გასატარებელი ღონისძიებები და ამ პროცესში ფუტკრის დაცვის უზრუნველყოფა, რომლის შესახებაც მეფუტკრეების შეკითხვებს უპასუხა და დეტალურად ისაუბრა სოფლის მეურნეობის სამინისტროს ხონის საინფორმაციო-საკონსულტაციო სამსახურის უფროსმა, ბადრი ბახტაძემ.