მეცნიერებმა მედიცინის სფეროში ერთ-ერთი ყველაზე დიდი ნაბიჯი გადადგეს. ამიერიდან, კიბოს დადგენა სისხლის საერთო ანალიზით იქნება შესაძლებელი. ჯონს ჰოპკინსის უნივერსიტეტის გუნდმა უკვე გამოსცადა მეთოდი, რომელიც დაავადების 8 გავრცელებულ ფორმას ავლენს.

დიდი ბრიტანეთის ექსპერტებმა განაცხადეს, რომ კიბოს გამოვლენის ახალი აღმოჩენა „ძალიან ამაღელვებელია“.

როგორც BBC წერს,The Cancer Seek ტესტი ცვლილებებს 16 გენში ეძებს, რომელიც რეგულარულად წარმოიშობა კიბოში და 8 პროტეინში, რომელიც ხშირად არის გამოშვებული.

ტესტი 1,005 პაციენტზე იქნა გამოცდილი, რომელთაც საკვერცხეების, ღვიძლის, ფილტვის, მუცლის, საყლაპავი მილის, პანკრეასის, მსხვილი ნაწლავის ან მკერდის კიბო ჰქონდათ.

საერთო ჯამში ტესტმა კიბოს 70% აღმოაჩინა.

ჯონს ჰოპკინსის უნივერსიტეტის სამედიცინო სკოლის დოქტორმა, ქრისტიან ტომასეტიმ BBC-ს უთხრა: „[კიბოს] ადრეული აღმოჩენის მომენტი გადამწყვეტია და შედეგები ძალიან დიდი აღფრთოვანების გამომწვევია. ვფიქრობ, ამას უზარმაზარი გავლენა ექნება კიბოთი სიკვდილიანობაზე“.

ადრეულ პერიოდში აღმოჩენილი კიბოს მკურნალობა კი უმეტეს შემთხვევაში სიცოცხლის გადარჩენის საწინდარია, თუმცა ზოგიერთ შემთხვევაში მკურნალობა შესაძლოა, უფრო უარესი იყოს, ვიდრე კიბოთი ცხოვრება, რომელიც სიცოხლისთვის დაუყოვნებლივ საფრთხის შემცველი არ არის.

მაგალითად, მამაკაცების შემთხვევაში, რომელთაც ნელა მზარდი პროსტატის კიბო აქვთ, დაავადების გულდასმითი მართვა უფრო უმჯობესია, ვიდრე მკურნალობა.

კიბოს 8 სახეობიდან 5-ის ადრეული გამოვლენისას სკრინინგის პროგრამა არ გამოიყენება. პანკრიასის კიბოს იმდენად მცირე სიმპტომები აქვს და იმდენად გვიან არის მისი აღმოჩენა შესაძლებელი, რომ ხუთიდან ოთხი პაციენტი დიაგნოზის დასმიდან მოკლე პერიოდში, იმავე წელს კვდება.

Cancer Seek ახლა ცდებს იმ ადამიანებზე ატარებს, ვისაც კიბოს დიაგნოზი არ აქვთ და ეს მისი გამოყენებადობის რეალური ტესტი იქნება.

იმედოვნებენ, რომ აღნიშნული მეთოდი შეავსებს სკრინინგის სხვა საშუალებებს, როგორიცაა მამოგრამა მკერდის კიბოსთვის და კოლონოსკოპია, კოლორექტალური კიბოსთვის.

ტესტის ღირებულება პაციენტისთვის 500 აშშ დოლარს შეადგენს. ეს კი თითქმის იგივე ფასია, რაც კოლონოსკოპია ჯდება.