თურქეთის არმია შესაძლოა სირიის ტერიტორიის სიღრმეში, პროვინცია იდლიბამდე შევიდეს, განაცხადა თურქეთის პრეზიდენტმა რეჯეფ თაიფ ერდოღანმა ქალაქ კოჯაელში სიტყვით გამოსვლისას.

მან აღნიშნა, რომ აფრინში სამხედრო ოპერაცია გრძელდება. „თუკი ალაჰი ნებას დაგვრთავს, ჩვენ იდლიბამდე მივალთ“, განაცხადა ერდოღანმა, როგორც ამას „რია ნოვოსტი“ „სპუტნიკ ტურცია“-ზე დაყრდნობით იტყობინება. ამასთან, მან ხაზი გაუსვა, რომ მთელი ერი გაერთიანდა აფრინში ოპერაციის მხარდასაჭერად, როგორც ეს 2016 წლის 15 ივლისს ქვეყანაში სამხედრო გადატრიალების მოწყობის მცდელობისას მოხდა.

თურქეთმა სირიის ჩრდილოეთ რეგიონში, აფრინში ქურთული ფორმირებების წინააღმდეგ, რომელსაც აშშ უჭერს მხარს, ოპერაციის, „ზეთისხილის რტო“ დაწყების შესახებ 20 იანვარს გამოაცხადა.

სირიის ხელისუფლებამ აფრინში თურქეთის ქმედება დაგმო და განაცხადა, რომ რეგიონი ქვეყნის განუყოფელ ნაწილს წარმოადგენს.