ამერიკის შეერთებულმა შტატებმა იმ რუსი პოლიტიკოსებისა და ბიზნესმენების ე.წ. შავი სია გამოაქვეყნა, რომელთა წინააღმდეგაც, შესაძლოა, სანქციები დაწესდეს. „რია ნოვოსტის" ცნობით, „კრემლის ანგარიშში” სულ 210 პირი, მათ შორის, 114 პოლიტიკოსი და 96 ბიზნესმენია.

აშშ-ის ფინანასთა სამინისტროს მიერ გამოქვეყნებულ ნუსხაში რუსეთის პრემიერ მინისტრი დიმიტრი მედვედევი, ასევე პუტინის ადმინისტრაციის წევრები - პრესსპიკერი დმიტრი პესკოვი და თანაშემწე ვლადისლავ სურკოვი, რუსეთის ფედერაციული საბჭოს სპიკერი ვალენტინა მატვიენკო და ენერგეტიკის მონისტრი ალექსანდრ ნოვაკი შედიან.

სანქციები შეიძლება დაუწესონ გაზპრომის აღმასრულებელ დირექტორ ალექსეი მილერს, როსნეფტის ხელმძღვანელ იგორ სეჩინსა და რუსეთის უსაფრთხოების ფედერალური სამსახურის უფროსს, ალექსანდრ ბორტნიკოვს.

„ოლიგარქების სიაში” ალიშერ უსმანოვი, რომან აბრამოვიჩი, სულეიმან კარიმოვი, „კასპერსკის ლაბორატორიის” შემქმნელი ევგენი კასპერსკი, გენადი ტიმჩენკო, ძმები როტენბერგები, ბანკ „ვითიბის“ ხელმძღვანელი ანდრეი კოსტინი, ასევე „ინტერ რაოს”, „რუსჰიდროს“, „როსატომის“ ხელმძღვანელები შედიან.

შეერთებული შტატები მიიჩნევს, რომ ყველა ეს პირი დაკავშირებულია აშშ-ის არჩევნებში რუსეთის შესაძლო ჩარევის საქმესთან, თუმცა, მათ წინააღმდეგ ჯერ არანაირი შეზღუდვები ძალაში არ შედის.