ამერიკის შეერთებული შტატების პრეზიდენტმა, დონალდ ტრამპმა კუბაზე გუანტანამოს ციხის დახურვის თაობაზე, წინამორბედის, ბარაქ ობამას ბრძანებულება გააუქმა. როგორც BBC იტყობინება, ტრამპმა გადაწყვეტილების შესახებ სამშაბათს, კონგრესში სიტყვით გამოსვლისას განაცხადა.

„მე ხელი მოვაწერე ბრძანებას, რომლითაც თავდაცვის მინისტრს ვავალებ გადაიხედოს ჩვენი პოლიტიკა სამხედრო დაკავებებთან დაკავშირებით. ამ ბრძანებით გუანტანამოს ბაზაზე სამხედრო დამნაშავეთა ციხე აღარ დაიხურება", განაცხადა ტრამპმა.

მანვე კონგრესს მიმართა თხოვნით, რომ  „ისლამურის სახელმწიფოს“ და „ალ-ყაიდას“ ტერორისტების წინააღმდეგ ბრძოლაში აუცილებელი ინსტრუმენტების არსებობა უზრუნველყოს. 

„ადრე, ჩვენ ასეულობით საშიში ტერორისტი გავუშვით მხოლოდ იმისთვის, რომ მათ ისევ შევხვედროდით ბრძოლის ველზე. ამ ტერორისტთა შორისაა „ისლამური სახელმწიფოს“ ლიდერი ალ-ბაღდადი", დაამატა ამერიკის პრეზიდენტმა. 

კუბაზე, გუანტანამოს სამხედრო ბაზაზე საერთაშორისო ტერორისტების ციხე 2002 წელს გაიხსნა. სპეციალურ სატუსაღოში ტერორიზმთან კავშირში ეჭვმიტანილებს ათავსებდნენ. ციხეში ხვდებოდნენ ეჭვმიტანილები მთელი მსოფლიოდან. 

ბარაქ ობამამ ციხის დახურვის გადაწყვეტილება მიიღო, თუმცა, მისი სისრულეში მოყვანა ვერ მოახერხა. მისი პრეზიდენტობის წლებში, ბევრი პატიმარი ჩამოშორდა აღნიშნულ დაწესებულებას. 

2016 წლის ბოლოს, ობამამ იმის მიუხედავად, რომ კონგრესმა გუანტანამოს ციხის დახურვის დაფინანსებაზე უარი თქვა, პირობა დადო, რომ გააგრძელებს ამ ციხის მსჯავრდებულთა სხვა ქვეყნებში გადაყვანას.