თბილისის საბურთალოს რაიონში, დიდი დიღმის მე-3 მიკრორაიონის დასაწყისში გაურკვეველი კომპანია მრავალსართულიან საცხოვრებელ კორპუსს ფეხბურთის სტადიონზე აშენებს, ტერიტორიაზე შეყვანილი ჰყავს მძიმე ტექნიკა, თუმცა კანონით გათვალისწინებული სავალდებულო აბრა, თუ რამდენსართულიანი იქნება საცხოვრებელი კომპლექსი, რომელი კომპანია დგას სამშენებლო სამუშაოების უკან, ვისი დაკვეთით სრულდება სამუშაოები და რა ვადებში იქნება მშენებლობა დასრულებული, შემოსაზღვრულ პერიმეტრზე მითითებული არსად არის.

ადგილობრივი მცხოვრებლები GUARDIAN.GE-სთან საუბრისას მშენებლობის გამო უკმაყოფილებას გამოხატავენ და ამბობენ, რომ კომპანიამ უკანონოდ მიითვისა ჯერ პირველ და მეორე კორპუსებთან მდებარე საფეხბურთო მოედანი, ხოლო შემდეგ მეორე კორპუსის კუთვნილი ავტოფარეხების მიმდებარე გამწვანებული ტერიტორია, სადაც კორპუსის ბინადართ სხვადასხვა მრავალწლოვანი ნარგავები აქვთ გაშენებული, რომელსაც, როგორც ადგილობრივები ვარაუდობენ, განადგურება ემუქრება, რადგან მათი ინფორმაციით, ნაწილობრივ, სწორედ აღნიშნულ ტერიტორიაზე არის დაგეგმილი მშენებლობის განხორციელება.

„დიდი დიღომში უკვე იმდენად მომრავლდა ერთმანეთზე მიდგმული მრავალსართულიანი კორპუსების მშენებლობები, რომ მალე აქ სუნთქვა აღარ იქნება შესაძლებელი, არავითარი სამშენებლო ნორმები არ არის დაცული, წვიმიან ამინდში, მშენებლობაზე დასაქმებულ სატვირთო ავტომანქანებს ცენტრალურ გზაზე დიდი რაოდენობით ტალახი შემოაქვთ. მერიამ, ბოლოს და ბოლოს, 21-ე საუკენეში, დედაქალაქში მაინც ხომ უნდა დაავალდებულოს სამშენებლო კომპანიები, რომ მათი მიმდებარე ტერიტორია ისე იყოს მოწესრიგებული, რომ ცემენტის, ქვიშის და სხვა სამშენებლო ნარჩენები და დიდი რაოდენობით ტალახიანი მიწა არ იყრებოდეს გზებზე, რომელიც გასული წლის ზაფხულში დაიგო კაპიტალურად, თუმცა ხედავთ ახლა როგორაა მტვრისა და ნაგვის სქელი ფენით დაფარული.

„მოკლედ, ისეა დაბინძურებული აქაურობა, რომ ცხოვრება აღარ შეიძლება. ჩვენი კორპუსების მცხოვრებლებს უკვე ბოლო მწვანე საფარს გვისპობენ, ან თუნდაც გახედეთ ქუჩის მეორე მხარეს რა ხდება, კერძო დასახლებებს 20-სართულიანი კორპუსები დაადგეს თავზე, ეს რაც აქ და ზოგადად, თბილისში ხდება, სრული კატასტროფაა“, უთხრა GUARDIAN.GE-ს ერთ-ერთმა ადგილობრივმა და დაამატა, რომ მერიამ სასწრაფოდ უნდა მიიღოს ზომები ქაოტური მშენებლობების აღსაკვეთად.

გაურკვეველ კომპანიაში დასაქმებული აზერბაიჯანულ ენაზე მოსაუბრე მუშები კომენტარს არ აკეთებენ და მხოლოდ იმას ამბობენ, რომ ისინი მათი ხელმძღვანელობის დავალებებს ასრულებენ.

GUARDIAN.GE-ის ინფორმაციით, ფეხბურთის მოედანი ჯერ კიდევ გიგი უგულავას მერობისას გაიყიდა, ხოლო მისი მიმდებარე ტერიტორია, რომელიც ადგილობრივ მცხოვრებლებს ჰქონდათ შემოსაზღვრული, ნარმანიას მერობის ბოლო პერიოდში.