რეგიონული განვითარებისა და ინფრასტრუქტურის სამინისტროს საქართველოს გაერთიანებული წყალმომარაგების კომპანია და მუნიციპალური განვითარების ფონდი ევროპის საინვესტიციო ბანკის დაფინანსებით, დაბა ასპინძაში წყალმომარაგების სისტემის რეაბილიტაციას ახორციელებს.


პროექტის ღირებულება ნახევარ მილიონ ლარზე მეტია. მისი განხორციელების შედეგად, დაბა ასპინძაში მცხოვრებ 600 ოჯახს, როგორც წყლის გრაფიკი, ასევე წყლის ხარისხი გაუუმჯობესდება.


მიმდინარე სამუშაოებს დღეს გაერთიანებული წყალმომარაგების კომპანიის დირექტორი, ვლადიმერ ლაზარიშვილი ასპინძის მუნიციპალიტეტის გამგებელთან, ლევან ცაბაძესთან და ადგილობრივი ხელისუფლების სხვა წარმომადგენლებთან ერთად გაეცნო.


სამინისტროს ინფორმაციით, წყლის ინფრასტრუქტურის რეაბილიტაციის შედეგად, დაბა ასპინძის 600-მდე ოჯახს წყლის გრაფიკისა და წყლის ხარისხის პრობლემა მოუგვარდება. კერძოდ, პროექტის განხორციელების შედეგად, დაბა ასპინძაში წყლის დანაკარგები მნიშვნელოვნად შემცირდება და როგორც წყლის ხარისხი, ასევე წყლის მიწოდების გრაფიკი გაუმჯობესდება.


უწყების ცნობით, ასპინძის მოსახლეობას ამჟამად ზოგიერთ უბანზეწყალი 2-3- საათიანი გრაფიკით, ხოლო ზოგიერთზე 10-საათიანი გრაფიკით მიეწოდება, პროექტის განხორციელების შედეგად, ისინი მაღალი ხარისხის სასმელ წყალს 16-24 საათიან რეჟიმში მიიღებენ.


პროექტის ფარგლებში, 100 მ³ მოცულობის არსებული რეზერვუარის გადახურვა მოხდება, 4.5 კმ სიგრძის ამორტიზებული მაგისტრალური მილსადენი კი შეიცვლება, ასევე, გამანაწილებელი ქსელის მშენებლობა მოხდება. ამ ეტაპზე 1150 მეტრი მილსადენი უკვე მოწყობილია.