ვერტმფრენმა, რომელსაც მექსიკის შინაგან საქმეთა მინისტრი და ოახაკას შტატის გუბერნატორი გადაჰყავდა, კატასტროფა განიცადა. BBC-ის ცნობით, სულ მცირე 13 ადამიანი, მათ შორის 3 ბავშვია დაღუპული. 

ინციდენტი პარასკევ ღამით მოხდა, ვერტმფრენის ქალაქ პინეტოპა ნაციონალში დაშვებამდე ცოტა ხნით ადრე. ოახაკის შტატში მდებარე საზღვაო ქალაქი 11 კილომეტრითაა დაცილებული პარასკევ საღამოს მომხდარი 7.2 მაგნიტუდის სიმძლავრის მიწისძვრის ეპიცენტრიდან.

შინაგან საქმეთა მინისტრმა ალფონსო ნავარეტემ, რომელიც ოახაკას გუბერნატორ ალეხანდრო მურატთან ერთად კატასტროფას გადაურჩა, ადგილობრივ მედიას განუცხადა, რომ ვერტმფრენმა კატასტროფა მას შემდეგ განიცადა, რაც მფრინავებმა „თვალნათლივ დაკარგეს საჰაერო ხომალდის კონტროლი“.

მინისტრი და გუბერნატორი ოახაკას შტატში მომხდარი 7.2 მაგნიტუდის სიმძლავრის მიწისძვრის შემდეგ, რასაც ამ დრომდე არსებული ინფორმაციით, მსხვერპლი და სერიოზული დაზიანებები არ მოჰყოლია, რეგიონში საზედამხედველო ტურს ახორციელებდნენ.

ნავარეტემ განაცხადა, რომ მთელი ქვეყნის მასშტაბით დაახლოებით 998 000 ადამიანია დარჩენილი ელექტროენერგიის გარეშე და ზოგიერთი საცხოვრებელი სახლი დაზიანებულია ოახაკას შტატში.

2017 წლის შემოდგომით, 7 და 19 სექტემბერს სეისმურად აქტიურ ზონაში მდებარე მექსიკაში ორი ძლიერი, 8.2 და 7.1 მაგნიტუდის სიმძლავრის მიწისძვრა მოხდა, რასაც 471 ადამიანი ემსხვერპლა და 8 შტატში 180 000-ზე მეტ სახლი დაზიანდა.