არჩილ ტატუნაშვილის ცხედარი ქართულ მხარეს დამოუკიდებელი ექსპერტიზის ჩატარების შემდეგ გადაეცემა, განაცხადა ოკუპირებული ცხინვალის რეგიონის დეფაქტო პრეზიდენტის წარმომადგენელმა პოსტკონფლიქტური დარეგულირების საკითხებში, მურად ჯიოევმა და ხაზი გაუსვა, რომ „ეს აუცილებელია იმისათვის, რომ არ არსებობდეს აზრთა სხვადასხვაობა გარდაცვალების მიზეზებთან დაკავშირებით“.

„საქართველოს მოქალაქის, არჩილ ტატუნაშვილის დაღუპვასთან დაკავშირებით, სოფელ ერგნეთთან ტექნიკური შეხვედრა გაიმართა. ჩვენ ავუხსენით საქართველოს წარმომადგენლებს, რომ იმისთვის, რომ არ არსებობდეს აზრთა სხვადასხვაობა საქართველოს მოქალაქის დაღუპვასთან დაკავშირებით, ჩვენს მიერ ჩატარებული ექსპერტიზის შემდეგ, უფრო მეტი ობიექტურობისთვის, მასალები დამოუკიდებელ ექსპერტიზაზე გაიგზავნა. ჩვენ ველოდებით დამოუკიდებელი ექსპერტიზის რეზულტატებს, რომლებიც უახლოეს მომავალში იქნება მზად. ამის შემდეგ კი გარდაცვლილის ცხედარი, ექსპერტიზის დასკვნის ასლთან ერთად ქართულ მხარეს გადაეცემა. ჩვენ ვთვლით ეს აუცილებელია იმისათვის, რომ არ არსებობდეს აზრთა სხვადასხვაობა გარდაცვალების მიზეზებთან დაკავშირებით და არ მოხდეს ამ საკითხის პოლიტიზება“, განაცხადა მურად ჯიოევმა და დაამატა, რომ დაკავებული საქართველოს კიდევ ორი მოქალაქე, ამ დრომდე ახალგორში იმყოფება და საქართველოს მიერ კონტროლირებად ტერიტორიაზე გადასვლას ადგილობრივი სამართალდამცველების მიერ საგამოძიებო მოქმედებების დასრულების შემდეგ შეძლებენ.