ოკუპირებული ცხინვალის რეგიონში, ამ დრომდე გაურკვეველ ვითარებაში გარდაცვლილი ყოფილი ქართველი სამხედრო პირის, არჩილ ტატუნაშვილის ოჯახის წევრებმა და ახლობლებმა, ნატახტარის მიმდებარე ტერიტორიაზე, დასავლეთ-აღმოსავლეთის ჩქაროსნულ ავტომაგისტრალზე დაწყებული ხმაურიანი საპროტესტო აქცია შინაგან საქმეთა მინისტრისგან პირობის მიღების შემდეგ შეწყვიტეს.

ტატუნაშვილის ოჯახის წევრებმა და ახლობლებმა ორშაბათ საღამოს, მცხეთის მუნიციპალიტეტის ტერიტორიაზე გამავალი ცენტრალური ავტომაგისტრალი მას შემდეგ გადაკეტეს, რაც ცნობილი გახდა, რომ ოკუპირებული ცხინვალის დეფაქტო რეჟიმმა ცხედრის ოჯახისთვის გადმოცემაზე უარი განაცხადა, როგორც მოგვიანებით გაირკვა, იმ მოტივით, რომ გარდაცვალების მიზეზების დასადგენად დამოუკიდებელი ექსპერტიზა უნდა ჩატარდეს.

„თუ გონს არ მოეგება ის სეპარატისტული რეჟიმი და რუსეთი და ჩვენი მთავრობა თუ დროზე არ ჩაერთვება მაქსიმალურად ამ საკითხის გადაწყვეტაში, ეს პროტესტი გახდება კიდევ უფრო ფართომასშტაბიანი“, განაცხადა ანტისაოკუპაციო მოძრაობის „ძალა ერთობაშია“ დამფუძნებელმა დავით ქაცარავამ.

ადგილზე ჩასულმა დევნილთა მინისტრმა, რომელიც ტატუნაშვილის ოჯახის წევრებს და ახლობლებს გაესაუბრა, თქვა, რომ ხელისუფლება საქართველოს მოქალაქის ცხედრის გადმოსასვენებლად ყველა ბერკეტს იყენებს, მაგრამ ოკუპაციის პირობებში ქართული მხარის მოქმედების არეალი შეზღუდულია.

„ძალიან კარგად იცით, ვის ხელშიც არის ამ ვითარების ბერკეტი. გზას გადავკეტავთ თუ რასაც გავაკეთებთ, ამითი ვავნებთ ჩვენ თავს და ჩვენ სახელმწიფოს... აბსოლუტურად ყველა ნაბიჯი გადადგმულია, მაგრამ როდესაც ქვეყნის ნაწილი არის ოკუპირებული და ოკუპანტი არის რუსეთი, კარგად მოგეხსენებათ რა ბერკეტებიც გვაქვს“, განაცხადა სოზარ სუბარმა.