სირიის დედაქალაქ დამასკოს სიახლოვეს, მეამბოხეთა მიერ კონტროლირებად აღმოსავლეთ ღუთაში ბრძოლები გრძელდება, იმის მიუხედავად, რომ სირიის მოკავშირე რუსეთის მთავრობის მიერ ორშაბათს, ყოველდღიურად ცეცხლის 5 საათით, ადგილობრივი დროით დილის 09:00-დან 14:00 სთ.-მდე, შეწყვეტის ბრძანება გაიცა.

აქტივისტების განცხადებით, სირიის მთავრობამ არაერთი საჰაერო და საარტილერიო დარტყმა განახორციელა, მაშინ როცა სახელმწიფო მედიამ ბრალი დასდო ამბოხებულებს იმ „ჰუმანიტარულ დერეფანზე“ საარტილერიო ცეცხლის დაშენაში, რომლის გავლითაც მშვიდობიანმა მოქალაქეებმა უნდა დატოვონ ტერიტორია.

აღნიშნულიდან გამომდინარე, როგორც BBC იუწყება, გაეროს დახმარება და სამედიცინო ევაკუაცია არ განხორციელებულა.

უფრო ადრე, შეერთებულმა შტატებმა მოუწოდა რუსეთს, გამოიყენოს მისი გავლენა, რომ გაეროს უშიშროების საბჭოს მიერ რამდენიმედღიანი დებატების შემდეგ შაბათს ერთსულოვნად მიღებული რეზოლუცია ცეცხლის 30 დღით შეწყვეტის თაობაზე, რეალურად ამოქმედდეს. თუმცა, უშიშროების საბჭოს, ცეცხლის შეწყვეტის დაწყების კონკრეტული თარიღი არ მოუცია.

სირიის ადამიანის უფლებების სადამკვირვებლო ორგანიზაციამ, რომელიც დიდ ბრიტანეთშია ბაზირებული, განაცხადა, რომ გასული ღამის განმავლობაში აღმოსავლეთ ღუთაში მდგომარეობა საგრძნობლად მშვიდი იყო, მაგრამ რუსეთის მიერ დაწესებული „ჰუმანიტარული პაუზის“ პირველი ორი საათის განმავლობაში ქალაქებზე - დუმაზე, ჰარასტასა და მიზრაბაზე არაერთი საარტილერიო ცეცხლი იქნა გაშვებული, მოგვიანებით კი ქალაქ ალ-შიფუნიაზე საჰაერო დარტყმები განხორციელდა და ორი ბომბი ჩამოვარდა, ხოლო ანკლავში სარაკეტო ცეცხლი იყო გახსნილი.