სამტრედიის მუნიციპალიტეტს იმერეთის გუბერნატორი, გივი ჭიჭინაძე და რეგიონის მუნიციპალიტეტების წარმომადგენლები სტუმრობდნენ. ადგილობრივი ხელისუფლების ინიციატივით ისინი სამტრედიაში მიმდინარე პროექტებსა და სამუშაოებს გაეცნენ.


სამტრედიის გამგებლის, ვალერი ფოცხვერიას ხელმძღვანელობით, მუნიციპალიტეტების წარმომადგენლები, სოფელ ტოლებში, მდინარე ხევისწყალაზე მიმდინარე ნაპირსამაგრ სამუშაოებს გაეცნენ, რომელიც უკვე დასასრულს უახლოვდება. სოფელში უხვი ნალექის პერიოდში ხშირად იქმნებოდა მეწყერისა და ღვარცოფის საშიშროება, ამიტომ ადგილობრივი ხელისუფლების გადაწყვეტილებით, მდინარეზე ჯებირების გამაგრება მოხდა.


იმერეთის რეგიონის მუნიციპალიტეტების ხელმძღვანელები სამტრედიაში ქართულ-ჰოლანდიური ინვესტიციებით აშენებული სათბური დაათვალიერეს. როგორც შეხვედრაზე აღინიშნა, ,,იმერეთი გრინერი“ უკვე რამდენიმე თვეა ფუნქციონირებს და აქ მოყვანილი მწვანილი ძირითადად ადგილობრივ ბაზარზე იყიდება.


სამტრედიის მუნიციპალიტეტის გამგებლის, ვალერი ფოცხვერიას ინიციატივით, სტუმრები დაბა კულაშის სამკერვალო ფაბრიკასაც სტუმრობდნენ. ,,მეთექს ჯორჯია“ თურქული ინვესტიციებით აშენებული სამკერვალოა, რომელიც უმეტესწილად სპორტულ ტანსაცელს აწარმოებს და ის ძირითადად უცხოეთის ბაზარზე იყიდება. იმერეთის გუბერნატორის, გივი ჭიჭინაძის განცხადებით, სამკერვალოში ადგილობრივი მოსახლეობაა დასაქმებული, თუმცა ისინი დაბალ ხელფასს იღებენ. როგორც გუბერნატორმა აღნიშნა, სამკერვალოს ადმინისტრაცია მათ ამ პრობლემის უახლოეს მომავალში მოგვარებას დაჰპირდა.


მსგავსი მუშა შეხვედრები იმერეთის რეგიონის ხელმძღვანელებთან პერიოდულად იმართება. როგორც სამტრედიის გამგებელმა აღნიშნა, შეხვედრებზე იმ პროექტების განხილვა მიმდინარეობს, რომელიც რეგიონში ხორციელდება. ვალერი ფოცხვერიას განცხადებით, შეხვედრებზე მუნიციპალიიტეტებში არსებული პრობლემებზეც მსჯელობენ, რომლის გადაწყვეტა მნიშვნელოვანი და აუცილებელია.