რუსეთის პრეზიდენტმა, ვლადიმერ პუტინმა, მოსკოვში, ერისადმი ყოველწლიურ მიმართვაში, რუსეთის საპრეზიდენტო არჩევნებამდე 16 დღით ადრე, რომელშიც უდავო გამარჯვებას მას უწინასწარმეტყველებენ, განაცხადა, რომ განზრახული აქვს სიღარიბის განახევრება მომდევნო ექვსი წლის განმავლობაში და ისეთი პირობების შექმნა, რომლის დროსაც მოქალაქეების სიცოცხლის საშუალო ხანგრძლივობა 80 წელი იქნება.

პუტინმა აღნიშნა, რომ რუსეთმა ბოლო 30 წელიწადში იმდენ ცვლილებებს მიაღწია, რამდენსაც სხვები ასწლეულების განმავლობაში აღწევდნენ.

„მომავალ წლებში ჩვენ კიდევ უფრო მეტად უნდა გავაძლიეროთ ჩვენი ერთობა, რომ ჩვენ ვმუშაობდეთ, როგორც ერთი გუნდი, რომელსაც ესმის, რომ ცვლილებები გარდაუვალია“, განაცხადა პრეზიდენტმა.

მან ასევე რუსეთის, როგორც სამხედრო თვალსაზრისით ძლევამოსილ სახელმწიფოზეც შეაჩერა ყურადღება და თქვა, რომ რუსეთის ფედერაციის ან მისი მოკავშირეების წინააღმდეგ ბირთვული იარაღის ნებისმიერი გამოყენება მიჩნეული იქნება, როგორც ბირთვული თავდასხმა და პასუხი დაუყოვნებლივ იქნება გაცემული.

მისი თქმით, მაღალტექნოლოგიური სტრატეგიული იარაღის  შექმნის, მათ შორის ისეთი რაკეტის ქონის მიუხედავად, რომელსაც „მსოფლიოს ნებისმიერ წერტილში მიღწევა“ შეუძლია, რუსეთის ფედერაცია არავის არ ემუქრება და არ აპირებს ვინმეზე თავდასხმას.

პუტინმა მიმართვისას, რუსეთის მზარდი სამხედრო ძალაუფლების მქონე სახელმწიფოდ ჩამოყალიბებას მსოფლიოში მშვიდობის შენარჩუნების გარანტია უწოდა.  

„მივიჩნევ აუცილებლობად ხაზგასმით განვაცხადო, ეს ძალზე მნიშვნელოვანია: რუსეთის მზარდი სამხედრო ძლიერება - ეს საიმედო გარანტიაა მშვიდობისა ჩვენ პლანეტაზე, იმდენად რამდენადაც ეს ძლიერება ინარჩუნებს და მომავალშიც შეინარჩუნებს სტრატეგიულ ბალანსს და ძალთა ბალანსს მსოფლიოში“, თქვა პუტინმა.