პირველმა ვიცე-პრემიერმა, ეკონომიკისა და მდგრადი განვითარების მინისტრმა EBRD-ისა დაOECD-ის ერთობლივი ღონისძიება, სახელწოდებით „რეგიონში ბიზნეს ეთიკისა და კანონთან შესაბამისობის უზრუნველყოფის პრაქტიკის დანერგვა“ გახსნა.

ღონისძიება მცირე და საშუალო ბიზნესის განვითარებისა და ხელშეწყობის საკითხების განხილვას, ასევე ქვეყანაში ბიზნეს გარემოს გაუმჯობესებას დაეთმო.

სიტყვით გამოსვლისას, პირველმა ვიცე-პრემიერმა აღნიშნა, რომ ბოლო ხუთი წლის განმავლობაში საქართველოს მთავრობის მიერ განხორციელებული რეფორმების შედეგად, საქართველოში მნიშვნელოვნად გაუმჯობესდა საინვესტიციო კლიმატი, რეგულაციების შემცირებითა და ონლაინ სერვისების შემოღებით კი ბიზნესის წარმოება გამარტივდა.

„მთავრობის მიერ გადადგმული ნაბიჯები, შეექმნა კორუფციისგან თავისუფალი გარემო, წარმატებული და პროდუქტიული გამოდგა, რომელიც ასევე აისახა კერძო სექტორის საქმიანობასა და კორუფციის წინააღმდეგ ბრძოლის რეიტინგებში“, - განაცხადა დიმიტრი ქუმსიშვილმა.

პირველმა ვიცე-პრემიერმა ასევე აღნიშნა, რომ საქართველოს მთავრობა აქტიურად მუშაობს საინვესტიციო კლიმატის განვითარებაზე, კერძო სექტორში კონკურენტუნარიანობის გაუმჯობესებასა და გამჭვირვალე და სამართლიანი ბიზნეს გარემოს შექმნაზე.

„საქართველოს მთავრობის ოთხპუნქტიანი გეგმის ერთ-ერთი ძირითადი მიმართულების - მმართველობის რეფორმის მიზანია კერძო სექტორის ჩართულობის გაზრდა გადაწყვეტილებების მიღების პროცესში და ამ გზით საქართველოში უფრო პროგნოზირებადი და გამჭვირვალე ბიზნეს გარემოს უზრუნველყოფა“, აღნიშნა დიმიტრი ქუმსიშვილმა, როგორც ამას უწყების პრესსამსახური იტყობინება.