ვლადიმერ პუტინმა რუსეთის მოქალაქეებს მოუწოდა მივიდნენ 18 მარტის საპრეზიდენტო არჩევნებზე და თავიანთი ნება თავისუფლად გამოხატონ.

„ჩვენი ქვეყნის კონსტიტუციით, ხელისუფლების ერთადერთ უმთავრეს წყაროს ხალხი წარმოადგენს. ამ სიტყვებში, ამ მართებულ ფორმულაში უდიდესი აზრი დევს. სწორედ რომ ხალხის ნებაზე, რუსეთის თითოეულ მოქალაქეზეა დამოკიდებული , რა გზით წავა ჩვენი ქვეყანა, დამოკიდებულია რუსეთი და ჩვენი შვილების მომავალი“, განაცხადა პუტინმა.

მან თქვა, რომ ყველამ თავად უნდა გადაწყვიტოს, თუ ვის უნდა მისცეს ხმა. პუტინმა ხაზი გაუსვა, რომ რუსეთში ყოველთვის თავად წყვეტდნენ თავიანთ ბედს, იქცეოდნენ ისე, როგორც ამას სინდისი, სიმართლისა და სამართლიანობის გაგება კარნახობდათ.

მან დამაატა, რომ ეს თვისებები რუსების ეროვნულ ხასიათში დევს, და ამის შესახებ მთელმა მსოფლიომ იცის.

„გამოიყენეთ თქვენი უფლება აირჩიოთ ჩვენი დიადი, საყვარელი რუსეთის მომავალი“, განაცხადა პრეზიდენტმა.

რუსეთში საპრეზიდენტო არჩევნები კვირას, 18 მარტს ტარდება. საარჩევნო კამპანია ოფიციალურად 18 დეკემბერს დაიწყო. ქვეყნის უმაღლესი ხელმძღვანელის პოსტის დასაკავებლად 8 კანდიდატი იბრძვის. ესენი არიან: სერგეი ბაბურინი, პაველ გრუდინინი, ვლადიმერ ჟირინოვსკი, ვლადიმერ პუტინი, ქსენია სობჩაკი, მაქსიმ სურაიკინი, ბორის ტიტოვი და გრიგორი იავლინსკი.

პუტინის ერთ-ერთ მთავარ მოწინააღმდეგეს, ალექსანდრე ნავალნის კენჭისყრაში მონაწილეობაზე უარი ეთქვა.