თერჯოლის მუნიციპალიტეტის მერი ბონდო სოფრომაძე, მოადგილე მანუჩარ ფანჩულიძე, მერის თანაშემწე გიორგი ამირანაშვილი და საკრებულოს წევრი გიორგი ფანჩულიძე სოფ. სიქთარვის ადმინისტრაციულ შენობაში იმყოფებოდნენ, სადაც შესაბამისი სარემონტო და გამაგრებითი სამუშაოების ჩატარების შემდეგ დროებით სიქთარვის საჯარო სკოლა განთავსდა.

მუნიციპალიტეტის პირველი პირები საჯარო სკოლის დირექტორს ია კვატაიასა და პედკოლექტივს გაესაუბრნენ პრობლემებისა და საჭიროებების შესახებ, ასევე საკლასო ოთახები და საჯარო სკოლის ძველი შენობა დაათვალიერეს, რომლის დემონტაჟიც მალე დაიწყება.

„2018 წლიდან სკოლების ინფრასტრუქტურაზე ზრუნვა ადგილობრივი თვითმმართველობების უფლებამოსილებაში გადავიდა. თერჯოლის მუნიციპალიტეტის მერმა ბონდო სოფრომაძემ ხელი მოაწერა მემორანდუმს, რომელიც საქართველოს რეგიონული განვითარებისა და ინფრატრუქტურის სამინისტროს, განათლებისა და მეცნიერების სამინისტროს, საგანმანათლებლო და სამეცნიერო ინფრასტრუქტურის განვითარების სააგენტოსა და საქართველოს ყველა მუნიციპალიტეტის ხელმძღვანელ პირს შორის გაფორმდა.

„ახალი სკოლების მშენებლობის პროცესი, არსებული სკოლების რეაბილიტაციისა და რემონტის პროცესი დელეგირებული იქნა, განათლებისა და მეცნიერების სამინისტროს ნაცვლად, ადგილობრივ თვითმმართველობებზე. მუნიციპალიტეტები თავად შეისწავლიან სკოლების საჭიროებებს, განსაზღვრავენ პრიორიტეტებს და გამოაცხადებენ ტენდერს ახალი პროექტების განხორციელების მიზნით“, აღნიშნულია თერჯოლის მერიის პრესსამსახურის მიერ გავრცელებულ ინფორმაციაში.