ლენტეხის მერი ბადრი ლიპარტელიანი მუნიციპალიტეტში, მდინარეებზე, ხელედულასა და დევაშზე ჰიდროელექტროსადგურ „ხელედულა 3“-ის დაგეგმილ მშენებლობასთან დაკავშირებით მიიჩნევს, რომ სამუშაოები მას შემდეგ უნდა დაიწყოს, რაც სპეციალისტები ჰესის მშენებლობის მიზანშეწონილობას დაადგენენ.

GUARDIAN.GE-სთან საუბრისას, ბადრი ლიპარტელიანი ჰესის მშენებლობის გამო ქვემო სვანეთის მოსახლეობის პროტესტს გამოეხმაურა და აღნიშნა, რომ იმ შემთხვევაში, თუ თურქული კომპანია რომელმაც სამშენებლო სამუშაოები უნდა განახორციელოს, დაარწმუნებს ადგილობრივებს, რომ „ხელედულა 3“-ის მშენებლობა ზიანის მომტანი არ იქნება, მოსახლეობა წინააღმდეგ არ წავა.

(ლენტეხის მერი ბადრი ლიპარტელიანი - GUARDIAN.GE-ს ფოტო)

მანამდე კი, ვიდრე თურქული კომპანია ამას შეძლებს, ლენტეხის მერის განცხადებით, კომპანიის წარმომადგენლებსა და ადგილობრივებს შორის შეხვედრა რამდენჯერმე კონსენსუსის მიღწევის გარეშე დასრულდა.

GUARDIAN.GE-ს შეკითხვაზე, იმ შემთხვევაში თუ კონკრეტულ კომპანიასა და ადგილობრივ მცხოვრებლებს შორის ვერ იქნება შეთანხმება მიღეწული და არ მოხდება მოსახლეობის ინტერესების გათვალისიწინება, მას, როგორც ლენეხის მუნიციპალიტეტის მერს, როგორი პოზიცია ექნება, ბადრი ლიპარტელიანი პასუხობს:

„მოსახლეობას აქვს შეკითხვები, ხომ არ იქნება ეს ზიანის მომტანი მათთვის, რა შედეგი მოჰყვება მშენებლობას ადგილობრივებისთვის. უნდა ჩატარდეს შესაბამისი ექსპერტიზა, უნდა მოხდეს განხილვა, რამდენად ზიანის მომტანი იქნება ან სასიკეთო ჰესის აშენება. მე პირადად საქმის კურსში არ ვარ, არის თურქული კომპანია, რომლის გადასაწყვეტიც არის ეს ყველაფერი. კონკრეტულად ჰესის მშენებლობის დეტალები არ ვიცი. ჯერჯერობით, ამ ეტაპზე ყველაფერი გაჩერებულია.

თურქული კომპანიის წარმომადგენლები ჩამოსულები იყვნენ, შემხვდნენ მოსახლეობას ორჯერ, თუმცა, ჯერჯერობით კონსენსუსი მიღწეული არ არის. დამატებითი ძალა უნდა ჩაერთოს ამ საკითხში. თუ თურქული კომპანია დაამტკიცებს, რომ ჰესის მშენებლობა ზიანისმომტანი არ იქნება, მოსახლეობა წინააღმდეგი არ არის.

ჩემი აზრი ასეთი არის, რომ უნდა შეისწავლონ ეს საკითხი, ჩართული უნდა იყოს მთავრობა, არასამთავრობო სექტორი, სპეციალისტები და შესწავლის შემდეგ გამოიტანონ დასკვნები“, განუცხადა ბადრი ლიპარტელიანმა GUARDIAN.GE-ს, რომელიც აღნიშნულ საკითხზე ლენტეხის საკრებულოს თავმჯდომარესაც ესაუბრა.

(ლენტეხის საკრებულოს თავმჯდომარე გიორგი გაზდელიანი - GUARDIAN.GE-ს ფოტო)

გიორგი გაზდელიანი მიიჩნევს, რომ ჰიდროელექტროსადგურის მშენებლობის პროექტთან დაკავშირებით გასათვალისწინებელია „სახელმწიფოს ინტერესები და მოსახლეობის ინტერესებიც”.

„მოსახლეობის ინტერესია, რომ უსაფრთხოებასთან დაკავშირებით ფლობდნენ სრულ ინფორმაციას. აღნიშნულთან დაკავშირებით, ჩვენ, ჩვენი მხრიდან შევეხმიანეთ კომპანიის წარმომადგენელს, ნოდარ კურტანიძეს. ისინი მზად არიან იმისთვის, რომ ადგილობრივებს ნებისმიერი ინფორმაცია მიაწოდონ.... მას შემდეგ, რაც დალაგდება ურთიერთობა მოსახლეობასა და კომპანიას შორის, დაიწყება კონკრეტული სამუშაოები”, აღნიშნა გიორგი გაზდელიანმა GUARDIAN.GE-სთან საუბრისას.