დიდმა ბრიტანეთმა და ევროკავშირმა „დიდწილად“ მიაღწიეს შეთანხმებას, რომელიც დიდი ბრიტანეთის ბლოკიდან „ორგანიზებულ გასვლას“ განაპირობებს.

როგორც ამ წუთებში BBC იუწყება, „ბრექსიტის“ მომლაპარაკებლებმა მიშელ ბარნიემ და დევიდ დევისმა განაცხადეს, რომ შეთანხმება რასაც დიდი ბრიტანეთი იმპლიმენტაციის პერიოდს უწოდებს, „გადამწყვეტი ნაბიჯი“ იყო. მაგრამ რჩება ზოგიერთი საკითხი, მათ შორის ჩრდილოეთ ირლანდიის საზღვრის საკითხი, რომელიც ჯერ კიდევ უნდა გადაწყდეს.

გარდამავალი პერიოდი 2019 წლის 29 მარტიდან 2020 წლის დეკემბრამდე უნდა გაგრძელდეს და ის უნდა გახდეს მომავალი ხავერდოვანი ხანგრძლივი ურთიერთობის საწინდარი.

ბარნიემ განაცხადა, რომ ასევე მიღწეულია შეთანხმება დიდ ბრიტანეთში მცხოვრები 4.5 მილიონი ევროკავშირის მოქალაქის და ევროკავშირში მცხოვრები 1.2 მილიონი დიდი ბრიტანელის უფლებებზე, მას შემდეგ რაც ბრექსიტი ძალაში შევა, და ეს ასევე ითვალისწინებს იმ მოქალაქეებისთვისაც, რომლებიც დიდ ბრიტანეთში გარდამავალ პერიოდში ჩავლენ, იგივე უფლებების მინიჭებას, რაც ბრექსიტამდე ჩასულებს ექნებათ.

დიდ ბრიტანეთს გარადმავალ პერიოდში ასევე მოლაპარაკებების გამართვისა და სავაჭრო შეთანხმებებზე ხელმოწერის შესაძლებლობა ექნება.

დიდი ბრიტანეთი და ევროკავშირი იმედოვნებენ, რომ გარდამავალი პერიოდის შეთანხმების პირობებზე ხელმოწერა მიმდინარე კვირას, ევროკავშირის სამიტზე იქნება შესაძლებელი.

დიდი ბრიტანეთის პრემიერ მინისტრის განცხადებით, შეთანხმებამ აჩვენა, რომ „ორივე მხარის კეთილმოსურნეობამ“ შესაძლებელი გახადა შეთანხმების მიღწევა, რომელიც ყველასათვის მუშაობს.

„ბევრი მძიმე შრომა იქნა გაწეული იმისათვის, რომ ჩამოყალიბებულიყო გრაფიკი და დეტალები იმპლიმენტაციის პერიოდისათვის, როცა ჩვენ ფაქტობრივად დავტოვებთ ევროკავშირს მომავალ მარტს. ასე რომ, ჩვენ შეგვეძლება გადავინაცვლოთ... მძლავრი ეკონომიკური პარტნირობისაკენ, რომელიც ჩვენ მომავალში გვსურს რომ გაგვაჩნდეს ევროკავშირთან“, განაცხადა ტერეზა მეიმ.