დღეს „რუსთავი 2"-ის შენობასთან ადგილი ჰქონდა სისხლის სამართლის დანაშაულს, ასე აფასებს „რუსთავი 2"-ის გენერალური დირექტორი ნიკა გვარამია ტელეკომპანიასთან რამდენიმე საათის წინ აქციაზე მომხდარ ინციდენტს.

მისი თქმით, „ქართული მარში", რომელიც აქციის ორგანიზატორი იყო, „არ წარმოადგენს არც ქრისტიანულ ძალას და არც საქართველოს ინტერესების დამცველ ძალას. ეს არის მოძალადე რუსული ორიენტაციის და იქიდან დაფინანსებული ძალა, რომელიც პერიოდულად და სისტემატურად ჩადის სისხლის სამართლის დანაშაულებს".

„და დღეს მან ჩაიდინა მორიგი სისხლის სამართლის დანაშაული. ფიზიკური ზემოქმედება მოახდინა ჩვენს ჟურნალისტებზე, რამდენიმე მათგანი არის დაშავებული და ერთი არის ჰოსპიტალიზებული.

პრაქტიკულად, თავისუფლება უკანონოდ აღუკვეთა ჟურნალისტ გიორგი გაბუნიას და არხის იურისტს, თამთა მურადაშვილს, როცა ისინი პრაქტიკულად დატყვევებული ჰყავდა მანქანაში და არ აძლევდნენ შესაძლებლობას გაეგრძელებინათ გადაადგილება. და რომ არა ჩვენი დაცვის სამსახურის ძალისხმევა, შეიძლებოდა ძალიან მძიმე შედეგებამდე მივსულიყავით. ჩვენი შეფასებით, ადგილი ჰქონდა თავისუფლების აღკვეთის ძალიან მძიმე დანაშაულს და მოვითხოვთ ხელისუფლებისგან ამ დანაშუალში მონაწილე ცალკეული პირების და ორგანიზატორების მკაცრად, სისხლისსამართლებრივი წესით დასჯას", განაცხადა ნიკა გვარამიამ ცოტა ხნის წინ გამართულ საგანგებო ბრიფინგზე და დაამატა:

„რუსთავი 2" მიმართავს საერთაშორისო თანამეგობრობას, საქართველოში აკრედიტებულ დიპლომატებს, პოლიტიკურ ძალებს, არასამთავრობო ორგანიზაციებს და საქართველოს ხალხს, ჩვენი ტელეკომპანია დგას ანგარიშსწორების რისკის წინაშე რუსეთიდან მართული და დაფინანსებული ძალების მხრიდან. მოგიწოდებთ, გააკეთოთ ყველაფერი, რაც თქვენ ძალებში შედის, რათა დაცულ იქნას ჩვენი უსაფრთხოება და ჟურნალისტური თავისუფლება. საქართველოს ხელისუფლებას ვაფრთხილებ, არამხოლოდ ჟურნალისტ გიორგი გაბუნიას, „რუსთავი 2"-ის რომელიმე თანამშრომელზე ნებისმიერი ზემოქმედების, მათი თმიდან ერთი ღერი თმის ჩამოვარდნის შემთხვევაში, პასუხისმგებლობა მთლიანად ეკისრება საქართველოს ხელისუფლებას".

ნიკა გვარამიამ მართლმადიდებელ მრევლს გადაცემა P.S.-ში ჟურნალისტ გიორგი გაბუნიას მიერ გაკეთებული განცხადების გამო ბოდიში მოუხადა და აღნიშნა, რომ  გაბუნიას აღნიშნული განცხადების გამო საყვედური გამოეცხადა.

„რუსთავი 2”-ის შენობასთან „ქართული მარშის” აქციაზე ინციდენტი მოხდა.

აქციის მონაწილეები გიორგი გაბუნიასგან გუშინ გადაცემა P.S.-ში მის მიერ გაკეთებული განცხადების გამო ბოდიშის მოხდას მოითხოვდნენ. აქციის ორგანიზატორთა განცხადებით, აღნიშნული ტექსტით გაბუნიამ მართლმადიდებლური ეკლესიის მრევლს შეურაცხყოფა მიაყენა.