თერჯოლის მუნიციპალიტეტის მერის პირველი მოადგილე მანუჩარ ფანჩულიძე თერჯოლის საგანმანათლებლო რესურსცენტრის ხელმძღვანელს ქეთევან შეყრილაძესა და თერჯოლის მუნიციპალიტეტის საჯარო და კერძო სკოლების დირექტორებს შეხვდა.

„განათლება და განათლებული მომავალი თაობა ჩვენთვის-ადგილობრივი თვითმმართველობისათვის, პრიორიტეტია. თქვენი როლი კი ამ საქმეში დიდია. თქვენ ხართ ადამიანები, რომელთა აზრი და რჩევები საყურადღებო და მნიშვნელოვანია. მოგეხსენებათ, რომ 2018 წლიდან სკოლების ინფრასტრუქტურაზე ზრუნვა ადგილობრივი თვითმმართველობების უფლებამოსილებაში გადავიდა. ახალი სკოლების მშენებლობის პროცესი, არსებული სკოლების რეაბილიტაციის, რემონტისა და სხვა პროცესები დელეგირებული იქნა, განათლებისა და მეცნიერების სამინისტროს ნაცვლად, ადგილობრივ თვითმმართველობებზე. მოხდა დეცენტრალიზაცია, რაც კარგია იმისათვის, რომ ადგილობრივ დონეზე განვიხილოთ და დავგეგმოთ პრიორიტეტები. თანამშრომლობა კი უდაოდ საჭიროა. ჩვენ სერიოზული მხარდაჭერა გვაქვს განათლებისა და ინფრასტრუქტურის სამინისტროების მხრიდან საჯარო სკოლების ინფრასტრუქტურის გაუმჯობესების კუთხით, რაც ჩვენი თანამშრომლობით უფრო ეფექტური და ნაყოფიერი იქნება“, განაცხადა მანუჩარ ფანჩულიძემ.

შეხვედრის ბოლოს თერჯოლის მუნიციპალიტეტის მერის პირველმა მოადგილემ სხვადასხვა კითხვაზე უპასუხა და პედაგოგებს ხელისუფლების მხარდაჭერა აღუთქვა. დირექტორებმა კი, თავის მხრივ, მანუჩარ ფანჩულიძეს, რომელიც ბოლო დრომდე თერჯოლის საკრებულოს წევრი და ძევრის საჯარო სკოლის დირექტორი გახლდათ, წარმატებები უსურვეს.

ინფორმაციას და ფოტომასალას თერჯოლის მერიის პრესსამსახური ავრცელებს.