ექსპერტ მამუკა არეშიძის განცხადებით, დედაქალაქის მერიის უმოქმედობა საზღვრებს გასცდა და ნარმანიას უწყებაში ახლახან ერთ-ერთ მნიშვნელოვან თანამდებობაზე დავით კეზერაშვილის კადრიც კი დანიშნეს. ამ თემებზე არეშიძემ გაზეთ ,,კვირის პალიტრისთვის“ მიცემულ ინტერვიუში განაცხადა.


,,მერიაში ისეთი არაჯანსაღი ვითარებაა, მიჭირს კიდეც ამაზე ლაპარაკი. თუნდაც რაც ცოტნე დადიანის ქუჩასთან დაკავშირებით მოხდა, ეს არის სირცხვილი - ვიდრე პრემიერი არ ჩაერია საქმეში, არ ეღირსა ამ ქუჩის ერთ პატარა მონაკვეთს გაკეთება. ავიღოთ მირზა შაფის ქუჩის პროექტი, გაიძახოდნენ, ღია კონკურსს ვატარებთო, საბოლოოდ კი ყველაფერი საზოგადოების ზურგს უკან გადაწყვიტეს, თანაც ყველაზე უარესად”,- აცხადებს არეშიძე.


მისი თქმით, მერიის ჩინოვნიკები, რომლებიც თანამდებობებზე ნათესაური ნიშნით დაინიშნენ, არაკომპეტენტურები არიან და ქალაქისთვის შეურაცხმყოფელ გადაწყვეტილებებს იღებენ.


,,მერიაში თანამდებობებზე მუშაობს ხალხი, რომელმაც არც თბილისის იცის რამე და არც არქიტექტურისა და ურბანისტიკისა. ეს ხალხი ატარებს კონკურსებს და იღებს ქალაქის შეურაცხმყოფელ გადაწყვეტილებებს“,- აცხადებს ექსპერტი.


არეშიძის ცნობით, მერიაში ერთ-ერთ მნიშვნელოვან თანამდებობაზე დავით კეზერაშვილის კადრიც დანიშნეს.


,,სიმართლე უნდა ითქვას, რომ მთლად ნარმანიაც არ არის დამნაშავე. ვისაც არ დაეზარა, ყველამ თავისი კაცის დანიშვნა მოიწადინა მერიაში, პროფესიონალიზმს კი არა აქვს მნიშვნელობა, არამედ პოლიტიკურ კუთვნილებას.


გარდა ამისა, ერთ-ერთ მნიშვნელოვან თანამდებობაზე დანიშნეს დავით კეზერაშვილის კადრი, აბა, მეტი რაღა უნდა ვთქვა. მერიაში სრული აჯაფსანდალია“,- აღნიშნავს მამუკა არეშიძე.