გერმანიის პოლიციის მიერ კარლეს პუჩდემონის პატიმრობაში აყვანის შემდეგ ესპანეთის შემადგენლობაში მყოფ კატალონიაში კვირას საპროტესტო გამოსვლებმა იფეთქა.

BBC-ის ცნობით, პროტესტანტებსა და პოლიციას შორის შეხლა-შემოხლის შედეგად დაზიანებები მიიღო სულ მცირე 89 ადამიანმა, დაპატიმრებულია 4 პირი.

კატალონიის ყოფილი პრეზიდენტი კარლეს პუჩდემონი, რომელზეც ძებნა ესპანეთის პროკურატურას ჰქონდა გამოცხადებული, გერმანიის პოლიციამ, დანიისა და გერმანიის საზღვრის გადაკვეთისას დააკავა.

იგი ხუთშაბათის შემდეგ ვიზიტად ფინეთში იმყოფებოდა, საიდანაც პარასკევს, დაპატიმრების თავიდან არიდების მიზნით გავიდა და ბელგიაში აპირებდა ჩასვლას.

იგი თვითდაწესებულ დევნილობაში სწორედ ბელგიაში იმყოფებოდა მას შემდეგ, რაც კატალონიის პარლამენტმა გასული წლის ოქტომბერში ცალმხრივად გამოაცხადა ესპანეთისაგან გამოყოფისა და დამოუკიდებლობის შესახებ.

პუჩდემონის მიმართ ესპანეთის პროკურატურის მიერ დაუმორჩილებლობისა და ამბოხებისკენ მოწოდების ბრალდებები მას 30-წლიან პატიმრობას უქადის.

კატალონიის ყოფილი პრეზიდენტი გერმანიის სასამართლოს წინაშე ორშაბათს, მოგვიანებით წარსდგება.

ცენტრალურ ბარსელონაში პროტესტანტები, რომლებიც ევროპული კომისიის და გერმანიის საკონსულოს ოფისებისკენ მიემართებოდნენ, შემდეგ სიტყვებს გაჰყვიროდნენ: „თავისუფლება პოლიტიკურ პატიმრებს“ და „ეს ევროპა სამარცხვინოა!“.

ესპანური ახალი ამბების სააგენტო „ეფეს“ ცნობით, ბარსელონას ცენტრში დაახლოებით 55 000 ადამიანი იყო შეკრებილი.

უფრო მცირე ზომის დემონსტრაციები გაიმართა გირონაში, სადაც პუჩდემონი ერთ დროს მერად მსახურობდა, ტარაგონასა და ლეიდაში. ზოგიერთმა პროტესტანტმა სხვადასხვა ადგილას საავტომობილო გზებიც გადაკეტა.