რუსი ჯაშუშის სერგეი სკრიპალის დიდ ბრიტანეთში მოწამვლის გამო მსოფლიოს არაერთი ქვეყნიდან რუსი დიპლომატების მასობრივ გაძევებასა და „სკრიპალის საქმესთან“ დაკავშირებით ნატოს გეგმებზე ჩრდილოატლანტიკური ალიანსის გენერალურმა მდივანმა იენს სტოლტენბერგმა ისაუბრა.

„ნატოს წევრ ქვეყნებს შორის ინტენსიური კონსულტაციები მიმდინარეობდა. ამ კონსულტაციების შედეგად მივედით იქამდე, რომ 25-ზე მეტმა მოკავშირემ და ნატოს პარტნიორმა თავიანთი ქვეყნებიდან 140-ზე მეტი რუსეთის წარმომადგენელი გააძევა. ეს ფართო, გადამწყვეტი და კოორდინირებული საერთაშორისო რეაქციაა“, განაცხადა სტოლტენბერგმა.

„ნატოს აქვს ძალიან მკაფიო გზავნილი რუსეთისადმი, რომ რუსეთის ქმედებას აქვს საფასური. მე ფაქტობრივად, ვფიქრობ, რომ რუსეთმა სათანადოდ ვერ შეაფასა ნატოს მოკავშირეების ერთიანობა, იმით, რითაც ჩვენ ვუპასუხეთ, ერთიანობით, რომელიც ჩვენ ვაჩვენეთ, როცა საუბარი შეეხება ჩვენი კოლექტიური თავდაცვის გაძლიერებას ცივი ომის დასრულების შემდეგ... და იმ ფაქტით, რომ წლების განმავლობაში თავდაცვითი ინვესტიციების შემცირების შემდეგ, ჩვენ ახლა ვზრდით თავდაცვის ინვესტიციებს. მე არ ვფქირობ, რომ რუსეთი ამას მოელოდა. ასევე, მე არ ვფიქრობ, რომ ისინი მოელოდნენ, რომ  ნატოს მოკავშირეები პარტნიორებთან იმის შემძლე ყოფილიყვნენ, რომ თანხმობა განეცხადებინათ ერთიანად დგომაზე ეკონომიკური სანქციების იმპლიმენტაციაში“, აღნიშნა სტოლტენბერგმა. 

ალიანსის ხელმძღვანელობის გადაწყვეტილებით კი, ნატოში რუსეთის მუდმივმოქმედ მისიაში დიპლომატების გაძევების შედეგად, თანამშრომლების რაოდენობა 1/3-ით შემცირდება.
 

ამის მიუხედავად, ალიანსს არ აქვს განზრახული გადადოს რუსეთი-ნატოს საბჭოს სხდომის მოსამზადებელი სამუშაოები. სტოლტენბერი ირწმუნება, რომ დღევანდელი ნაბიჯები არ ცვლის ალიანსის პოლიტიკას რუსეთთან მიმართებაში, რომელიც მოიცავს „მძლავრ შეკავებას, თავდაცვას და დიალოგისაკენ ღიაობას“.