ახალქალაქის მერის, იურიკ უნანიანის განცხადებით, ძლიერმა ქარმა მუნიციპალიტეტის 17 სოფელში საცხოვრებელ სახლებს და სხვა შენობა-ნაგებობებს სახურავები გადახადა, კომისია კი ზარალის ოდენობის დათვლას ასრულებს, რის შემდეგაც ადგილობრივი ხელისუფლება დახმარებისთვის ცენტრალურ ხელისუფლებას მიმართავს. მერი ვარაუდობს, რომ ზარალის ოდენობა შესაძლოა, 70 ათასამდე ლარი იყოს.

(ახალქალაქის მუნიციპალიტეტის მერი იურიკ უნანიანი GUARDIAN.GE-ს ფოტო)

„სტიქიამ მუნიციპალიტეტის 17 სოფელი დააზარალა. ზარალის დამთვლელი კომისია ზარალის ოდენობის დადგენაზე მუშაობს, კონკრეტული შედეგი, სავარაუდოდ, დღის ბოლოს ან ხვალ გახდება ცნობილი. ზარალი, დაახლოებით, 60-70 000 ლარამდე იქნება, ჩემი ვარაუდით.

„კონკრეტული შედეგის შემდეგ, ჩვენ, ახალქალაქის მუნიციპალიტეტის ადგილობრივი ხელისუფლება, მივმართავთ ცენტრალურ ხელისუფლებას და ვაცნობებთ ამის შესახებ, რის შემდეგაც გადაწყვეტილებას მთავრობა მიიღებს - ზარალის ნაწილს, ალბათ, ჩვენ ავანაზღაურებთ. მთავარი ის არის, რომ დაზარალებული მოსახლეობა ზარალის ანაზღაურების გარეშე არ დარჩება - დავეხმარებით ყველანაირად“, უთხრა GUARDIAN.GE-ს იურიკ უნანიანმა.

(მასალაში გამოყენებულია ახალქალაქის მუნიციპალიტეტის მერიის პრესსამსახურის ფოტოები)

ახალქალაქის მუნიციპალიტეტის სოფლებში სტიქიისაგან დაზიანებული შენობები ახალქალაქის მერმა, იურიკ უნანიანმა მის მოადგილეებთან და სამცხე-ჯავახეთის რეგიონში გუბერნატორის მოადგილესთან, გიორგი მიქელაძესთან ერთად მოინახულა.

მერი სტიქიისაგან დაზარალებულ ადგილობრივ მცხოვრებლებს გაესაუბრა და უთხრა, რომ კომისიის მიერ ზარალის დათვლისა და შესაბამისი თანხების დადგენისა და გამოყოფის შემდეგ ხელისუფლება მათ დახმარებას გაუწევს.