თერჯოლის მუნიციპალიტეტის მერმა, ბონდო სოფრომაძემ პირველ მოადგილესთან, მანუჩარ ფანჩულიძესა და მუნიციპალიტეტის სხვა ხელმძღვანელ პირებთან ერთად, ქალაქის ცენტრში მდებარე მინი სტადიონი დაათვალიერა, რომლის აღდგენაც ახლო მომავალში იგეგმება.

„ქალაქის ცენტრში მდებარე მინი სტადიონი, სადაც იმართება შეჯიბრებები სპორტის სხვადასხვა სახეობაში ადგილობრივი მოზარდებისა და ახალგაზრდების მონაწილეობით, შეკეთებას საჭიროებს და ეს უახლოეს მომავალში მოხდება.

თერჯოლას მოვლა-პატრონობა სჭირდება. ქალაქში არსებულ სხვადასხვა დანიშნულების საზოგადოებრივ ინფრასტრუქტურას - განახლება და რეაბილიტაცია. ჩვენ, ადგილობრივმა ხელისუფლებამ მოსახლეობასთან ერთად, უნდა მოვაწესრიგოთ, მოვუაროთ და მომავალ თაობებს გადავცეთ ჩვენი ქალაქი“, განაცხადა ბონდო სოფრომაძემ.

თერჯოლის მერიის პრესსამსახურის ცნობით, შეიცვლება ხელოვნური მწვანე საფარი, რეაბილიტირდება ღობე, სკამები, ფეხბურთის კარები, ჩატარდება სამღებრო სამუშაოები.

მუნიციპალიტეტის ხელმძღვანელმა პირებმა ასევე ქალაქის ცენტრი დაათვალიერეს, სადაც ა(ა)იპ დასუფთავებისა და კეთილმოწყობის მუნიციპალური ცენტრის მიერ მოხდა ხეების გადაბელვა მოქალაქეების უსაფრთხოებისა და ასევე, ხეების გაჯანსაღების მიზნით.