ბუტა რობაქიძის მკვლელობის საქმეზე ბრალდებული ზაზა ბაქრაძე გირაოს სანაცვლოდ გაათავისუფლეს. ბაქრაძეს აღკვეთის ღონისძიება – პატიმრობა შეეცვალა და 5 000-ლარიანი გირაოს სანაცვლოდ გათავისუფლდა.

ამის თაობაზე შუამდგომლობა ბრალდებულის ადვოკატმა თბილისის საქალაქო სასამართლოში დღევანდელი სხდომის დასრულებამდე დააყენა.

ზაზა ბაქრაძე სასმართლოს ჩვენებას ორი პროცესის განმავლობაში, დაახლოებით, 8 საათის განმავლობაში აძლევდა.

მისი მტკიცებით, 2004 წელს შემთხვევის ადგილი გააყალბეს, მითითებებს კი, ბრალდებულები – ზურაბ მიქაძე და გურამ დონაძე იძლეოდნენ.

ბაქრაძის თქმით, მან 2004 წლის 24 ნოემბერს ბუტა რობაქიძის მეგობარს ხელყუმბარა პირადად ჩაუდო. მოწმემ ბრალდების მტკიცებულებების გამოკვლევის დროს თქვა, რომ მტკიცებულებების ფალსიფიკაციას ბრალდებულები ზურაბ მიქაძე და გურამ დონაძე ახდენდნენ. მისივე ინფორმაციით, მტკიცებულებების გაყალბებაში მონაწილეობდნენ ასევე დავით იაშვილი და ირაკლი ფირცხალავა.

ზაზა ბაქრაძეს ბრალად უფლებამოსილების ბოროტად გამოყენება და მტკიცებულებების ფალსიფიკაცია ედება. ის წლების განმავლობაში მიმალვაში იმყოფებოდა, 28 თებერვალს კი უკრაინიდან დაბრუნდა. ყოფილი მაღალჩინოსანი ბრალს აღიარებს.

ბუტა რობაქიძის სიცოცხლის მოსპობისას უფლებამოსილების ბოროტად გამოყენებასა და მტკიცებულებების ფალსიფიკაციას, ახალი გამოძიების პირობებში, ბრალდების მხარე ხუთ პირს – ზაზა ბაქრაძეს, გურამ დონაძეს, ზურაბ მიქაძეს, ირაკლი ფირცხალავასა და და დავით იაშვილს ედავება.