„კლინიკა ბომონდმა“ სოციალური პროექტის - „ბომონდი შენი ჯანმრთელობისთვის“ ფარგლებში, მოსახლეობის უფასოდ გასინჯვები თერჯოლიდან დაიწყო. პროექტის ფარგლებში, კლინიკის მედიკოსები თერჯოლის მუნიციპალიტეტის სოფელ ძევრის საჯარო სკოლაში იმყოფებოდნენ, სადაც ადგილზე მოახდინეს სკოლის პედაგოგების, მოსწავლეების, ასევე, სოფლის მოსახლეობის გასინჯვა და მათთვის კონსულტაციის გაწევა.

უფასო კვლევების მიმდინარეობას თერჯოლის მერის მოადგილე მანუჩარ ფანჩულიძე, მერის მოადგილე მერაბ სირაძე, მერიის სოციალური სამსახურის უფროსი დიანა ფოცხვერაშვილი და თერჯოლის საგანმანათლებლო რესურსცენტრის ხელმძღვანელი ქეთევან შეყრილაძე ესწრებოდნენ.

მანუჩარ ფანჩულიძის განცხადებით, „ადგილობრივი თვითმმართველობა დაინტერესებულია, რომ მოქალაქეებს მაქსიმალური ხელმისაწვდომობა ჰქონდეთ და შეძლონ საკუთარ ჯანმრთელობაზე ზრუნვა. მსგავსი აქციები იგეგმება მუნიციპალური ცენტრიდან მოშორებით მდებარე სხვა სოფლებშიც“.

აქციის ფარგლებში, პაციენტებს საშუალება ჰქონდათ ადგილზე ჩაიტარებინათ მუცლის ღრუს ექოსკოპია, ფარისებრი ჯირკვლის ექოსკოპია, მცირე მენჯის ექოსკოპია, კარდიოგრაფია და სრული ოფთალმოლოგიური გამოკვლევა. ასევე, მიიღეს თერაპევტის, კარდიოლოგის, პედიატრის, დერმატო-ვენეროლოგის, უროლოგის, ენდოკრინოლოგის, გინეკოლოგის და ოფთალმოლოგის კონსულტაცია.

„ბომონდი“ არის მრავალპროფილიანი, 100 საწოლზე გათვლილი, თანამედროვე სამედიცინო აპარატურით აღჭურვილი და პროფესიონალების გუნდით დაკომპლექტებული დასავლეთ საქართველოში დაარსებული პირველი კერძო კლინიკა, რომელიც პაციენტებს სამედიცინო მომსახურების სრულ სპექტრს სთავაზობს.

ინფორმაციას თერჯოლის მერიის პრესსამსახური ავრცელებს.