რუსეთის საგარეო საქმეთა სამინისტროს წარმომადგენელმა, მარია ზახაროვამ დიდ ბრიტანეთს და შეერთებულ შტატებს ბრალის დასდო იმაში, რომ ისინი რუსეთში ფეხბურთის მსოფლიო ჩემპიონატის ჩაშლას ცდილობენ.

რუსულ სატელევიზიო არხთან საუბრისას მან თქვა, რომ მათი „მთავარი მიზანია“ „მსოფლიო ჩეპიონატი რუსეთში არ ჩატარდეს“.

როგორც BBC იუწყება, ტელეარხ „5 TV“-სთან საუბრისას ზახაროვამ განაცხადა: „მექმნება შთაბეჭდილება, რომ ის რაზეც ისინი ზრუნავენ არის ის, რომ რუსეთი მსოფლიო თასიდან გამოთიშონ. ისინი ყველანაირ ღონეს იხმარენ ამისათვის“.

დიდი ბრიტანეთი ცდილობს დასაჯოს რუსეთი მას შემდეგ, რაც მას ბრიტანეთის მოქალაქის, ყოფილი რუსი ჯაშუშის, სერგეი სკრიპალის და მისი 33 წლის ქალიშვილის რუსული წარმოების ქიმიური იარაღით, „ნოვიჩოკით“ მოწამვლაში დასდო ბრალი.

სამეფო ოჯახი მსოფლიო თასზე დასასწრებად რუსეთში ჩასვლას არ აპირებს.

დიდი ბრიტანეთის საგარეო საქმეთა მინისტრმა, ბორის ჯონსონმა რუსეთის მსოფლიო თასი ნაცისტური გერმანიის 1936 წლის ოლიმპიურ თამაშებს შეადარა, ხოლო ერთ-ერთმა ბრიტანელმა პარლამენტარმა მსოფლიო ჩემპიონატის გადადების ან სხვა ქვეყანაში გადატანის მოწოდება გააკეთა.

მიუხედავად ამისა, ამჟამად დღის წესრიგში არ დგას საკითხი, რომ ინგლისის საფეხბურთო გუნდი ბოიკოტის გამოცხადებას აპირებდეს პრესტიჟული ჩემპიონატისათვის, რომელიც ივნისში გაიხსნება.