საქართველოს თავდაცვის სამინისტროს „არმიჰოლში“ სამხედრო პირადი შემადგენლობის მართვის საკითხებთან დაკავშირებით სემინარი დაიწყო. ღონისძიება საქართველოს გენერალური შტაბის უფროსმა, გენერალ-მაიორმა ვლადიმერ ჩაჩიბაიამ და თავდაცვის მინისტრის მოადგილემ, ნუკრი გელაშვილმა გახსნეს.

კურსი საქართველოს შეიარაღებული ძალების გენერალური შტაბის J-1 პირადი შემადგენლობის ორგანიზებით ტარდება და მისი მიზანი სამხედრო პირადი შემადგენლობის მართვის სისტემებზე მომუშავე რგოლების კოორდინაციის ამაღლებაა. ღონისძიების ფარგლებში მონაწილეები J-1 პირადი შემადგენლობის დეპარტამენტის ოპტიმიზაციის კუთხით დაგეგმილ სიახლეებს გაეცნობიან, ამ მიმართულებით არსებულ გამოწვევებზე იმსჯელებენ და სამომავლო გეგმებს განიხილავენ.

სემინარში გენერალური შტაბის დეპარტამენტის ხელმძღვანელები, აღმოსავლეთ საქართველოში დისლოცირებული ქვედანაყოფების სარდლები, ბრიგადისა და ბატალიონის მეთაურები და G-1 სამსახურის უფროსები, ასევე დასავლეთ საქართველოში დისლოცირებული ქვედანაყოფების სარდალი, ბრიგადის მეთაურები და ბრიგადის G-1 სამსახურის უფროსები მონაწილეობენ.

ორდღიანი სემინარი ინტერაქტიული ხასიათისაა. ანალოგიური ღონისძიება კადეტთა სამხედრო ლიცეუმში აპრილის მეორე ნახევარში გაიმართება, რომელსაც დასავლეთ საქართველოში დისლოცირებული ქვედანაყოფების პირადი შემადგენლობა დაესწრება.

ინფორმაციას თავდაცვის უწყების პრესსამსახური ავრცელებს.