ჩრდილოეთ კორეის დედაქალაქ ფხენიანში პოპულარული სამხრეთ კორეული „K-pop“-ის მომღერლებმა კონცერტი გამართეს, რომელსაც ქვეყნის უზენაესი ლიდერი კიმ ჩენ ინი მეუღლესთან ერთად დაესწრო. მან სამხრეთ კორეელ მომღერალთა ჯგუფის წევრებთან ერთად ფოტოც გადაიღო. 

ჩრდილოთ კორეამ ფხენიანში კონცერტის გასაშუქებლად ჩასული სამხრეთ კორეელი ჟურნალისტების ჯგუფს კი ბოდიში მოუხადა იმისათვის, რომ კონცერტის გაშუქების საშუალება არ მისცა, და როგორც ბრიტანული „გარდიანი“ წერს, ამგვარი ბოდიში იშვიათი შემთხვევაა ჩრდილოეთ კორეის მხრიდან.

სამხრეთ კორეის მთავრობამ მისი ჟურნალისტებისთვის დაწესებული შეზღუდვების გამო პროტესტი გამოთქვა. კიმ იონ ჩოლი, ჩრდილოეთ კორეელი გენერალი და სადაზვერვო სამსახურის ყოფილი ხელმძღვანელი ამის შემდეგ მივიდა ჟურნალისტების სასტუმროში და მათ ბოდიში მოუხადა, წერს „გარდიანი“.

„შეცდომა იყო თავისუფალი მედიისთვის გადაღების და რეპორტაჟების გაკეთების შეზღუდვა. ჩვენი ვალდებულებაა დავეხმაროთ სამხრეთ კორეის რეპორტიორებს თავისუფლად შეძლონ რეპორტაჟების და ფილმების მომზადება“, განაცხადა კიმ იონ ჩოლმა, როგორც ამას სამხრეთ კორეული ახალი ამბების სააგენტო Yonhap-ი იტყობინება.

აპრილის ბოლოს კიმ ჩენ ინის და სამხრეთ კორეის პრეზიდენტის, მუნ ჟე ინის შეხვედრაა დაგეგმილი ორი ქვეყნის გამყოფ დემილიტარიზებულ ზონაში.

GUARDIAN.GE  გთავაზობთ ჩრდილოეთ კორეის ცენტრალური სააგენტოს ფოტოებს.

ჩრდილოეთ კორეის ლიდერი კიმ ჩენ ინი სამხრეთ კორეული „K-pop“-ის მომღერლებს ხვდება

ჩრდილოეთ კორეის ლიდერი კიმ ჩენ ინი სამხრეთ კორეული „K-pop“-ის მომღერლებთან ერთად პოზირებს ფხენიანში

სამხრეთ კორეული „K-pop“-ის მომღერლები აღმოსავლეთ ფხენიანის დიდ თეატრში კონცერტს, სახელწოდებით - „გაზაფხული მოდის“ ატარებენ

ჩრდილოეთ კორეის ლიდერი კიმ ჩენ ინი და მისი მეუღლე რი სოლ ჯუ უყურებენ სამხრეთ კორეული „K-pop“-ის მომღერლების შესრულებას.

აუდიენცია უყურებს სამხრეთ კორეული „K-pop“-ის მომღერლების შესრულებას.

ჩრდილოეთ კორეის ლიდერი კიმ ჩენ ინი და მისი მეუღლე რი სოლ ჯუ ესალმებიან სამხრეთ კორეული „K-pop“-ის მომღერლებს აღმოსავლეთ ფხენიანის დიდ თეატრში