თერჯოლის მუნიციპალიტეტის მერიაში გამართულ მორიგ სამუშაო თათბირს, რომელსაც მუნიციპალიტეტის მერი ბონდო სოფრომაძე მოადგილეებთან მანუჩარ ფანჩულიძესა და მერაბ სირაძესთან ერთად უძღვებოდა, მერიის სამსახურებისა და განყოფილებების უფროსები, ადმინისტრაციულ ერთეულებში მერის წარმომადგენლები, ა(ა)იპ-ების ხელმძღვანელები ესწრებოდნენ.

მერიის პრესსამსახურის ცნობით, მუნიციპალიტეტის პირველმა პირმა ადმინისტრაციულ ერთეულებში მერის წარმომადგენლებისაგან მოისმინა ინფორმაცია სოფლებში არსებული მდგომარეობის, საგაზაფხულო სამუშაოების მიმდინარეობისა და საინფორმაციო შეხვედრების შესახებ, სადაც მოსახლეობას მიეწოდება ინფორმაცია აზიურ ფაროსანასთან ბრძოლის ძირითად პრინციპებზე, სახელმწიფოს მიერ მავნებლის საწინააღმდეგოდ დაგეგმილ ღონისძიებებსა და აზიურ ფაროსანასთან ბრძოლის სახელმწიფო სტრატეგიის განხორციელების გზებზე.

თათბირზე, ასევე მუნიციპალიტეტის მერმა, ბონდო სოფრომაძემ სამსახურის ხელმძღვანელებისაგან შესრულებული სამუშაოების შესახებ ინფორმაცია მოისმინა, მიმდინარე სამუშაოებს გაეცნო და დაგეგმილი სამუშაოების ეფექტურად და ოპერატიულად განხორციელებასთან დაკავშირებული მითითებები და დავალებები გასცა.